Ayub 39 - MUMA MALER 2015

¹ “Bende ing’eyo ndalo ma inywoloe mwanda? Koso iseneno ka ngau mae thim nywol?

² In inyalo kwano dueche ma igi pong’ie, kendo inyalo ng’eyo kinde ma onego ginywolie?

³ Koso in ing’eyo ndalo ma gigwomie ka muoch kayogi.

⁴ Nyithindgi dongo adonga e thim, to ka gisedoko motegno, to giweyo minegi, kendo ok gichak giduogi.

⁵ En ng’a mane ogonyogi momiyo gibayo abaya?

⁶ An ema ne amiyogi piny motwo mondo obed margi, kendo ne aweyo gidak e pewe motimo kado.

⁷ Gidak mabor gi mier, omiyo ok giwinj koko ma ji goyo, kendo onge ng’ama nyalo boyogi, mi gitine.

⁸ Gode e legegi ma gikwayoe, kuma gimanyoe gimoro amora mang’ich mondo gicham.

⁹ Bende jowi mae thim ditini? Koso iparo ni donindi e kund jambi adier?

¹⁰ Bende inyalo tueye e kwer mondo opurni puothi?

¹¹ Bende inyalo geno kuom tekone mathothno, mi iwe ni obiro tiyo tijeni madongo?

¹² Iparo ni onyalo keyoni, mi ochok cham okel dala?

¹³ Udo kwadho buombe aruya ahinya, to ok onyal huyo ka ogungo.

¹⁴ Oweyo tonge e lowo mondo oyud liet,

¹⁵ to ok ong’eyo ni gimoro nyalo nyonogi, mi gitore.

¹⁶ Ojwang’o tong’go ka gima ok mage, to bende ok odew ni oseketho tekre kayiem kuom nywologi.

¹⁷ An ema ne ok amiye rieko, momiyo odoko mofuwo.

¹⁸ To kata kamano, ka ochako ng’uech, to oyombo kata mana faras ma jang’uech, ma jaithne riembo.

¹⁹ Ayub, in ema ne ichueyo faras mondo obed motegno kamano? Koso in ema ne iketo yier maboyo e ng’ute?

²⁰ In ema ne ichueye mondo ochikre ka dede, kendo mondo obwog ji ka otwaro?

²¹ E sa lweny to ogiro, kodwaro mwomore gi tekre duto.

²² En, oonge gima oluoro, kendo onge ligangla manyalo dwoke chien.

²³ Gilweny ma jaithne oting’o twomore kendo mil e chieng’,

²⁴ en to otetni ateta, ka en gi chuny mar dhi e lweny, kendo ka tung’ oywak, to ok nyal geng’e.

²⁵ Ochur sa duto ma owinjoe ywak tung’, kendo owinjo tik lweny kata ka pok ochopo machiegni. Jolweny bende owinjo kagolo chik.

²⁶ In ema ipuonjo otenga huyo, koyaro buombene kochomo yo milambo?

²⁷ Koso in ema ongo rito chikni, eka oger ode malo ewi got?

²⁸ Ogero ode ewi lwendni maboyo moloyo, kendo wi gode mabitho ema oloko kare mar siro wasigu.

²⁹ Kanyo ema orangogo kuonde duto man maboyo, komanyo gima mondo onegi kendo ocham.

³⁰ Achudhe nur kuom gima otho, kendo nyithindgi nyodho remb gino.