Ayub 38 - MUMA MALER 2015

Ruoth Nyasaye omiyo Ayub oyie ni okia gik ma owacho

¹ Eka Ruoth Nyasaye nowuoyo gi Ayub gie boche polo, kowacho niya,

² “In ng’a, minyalo penjo rieko ma an-go? Fupi lilo ema inyiso.

³ Koro a malo ka dichwo, mondo idwok weche ma adwaro penjigi.

⁴ Ne intie ka achweyo piny koso? Nyisa ane, ka en adier ni in ng’ama riek mong’eyo gik moko duto kamano.

⁵ En ng’a mane opimo bor piny gi lachne? Donge ing’eyo gik ma kamago?

⁶ En ang’o momako sirni mag piny? Koso en ng’a mane oketo mise mare?

⁷ Chieng’no sulue ne wer kanyakla ka ugue wang’, kendo yawuot Nyasaye nokok gi ilo.

⁸ En ng’a mane oloro dhorangaye mondo ogeng’ nam, kane omwomo, mowuok ei piny?

⁹ An ema ne apong’o nam gi boche polo, mi aume gi rumbi molil.

¹⁰ Ne aketo tong’ ni nam, mi alorone dhorangeye.

¹¹ Eka ne anyise niya, ‘Ka eri ema igikie, ma kik ikadhi! Apakani madongogo nyaka gik mana kaeri.’

¹² In Ayub, bende nyaka nene isemiyoe piny oru?

¹³ Koso bende isechiko piny mondo oyawre maler, ong’eng’ joricho kuonde ma gipondoe?

¹⁴ Ka piny yawore, to gode gi holni nenore ka kido mogor e nanga.

¹⁵ Ler mar odiechieng’ bwogo joricho, kendo monogi timo timbe mahundu.

¹⁶ Bende isedhi e kude mag nam, kuma pige wuokie? Koso bende isewuotho e lowo manie bwo ataro?

¹⁷ Bende ng’ato osenyisie dhorangeye mag Piny Joma Otho, kuma otimo mudho?

¹⁸ Bende ing’eyo kaka duong’ mar piny romo? Dwoka ane, ka ing’eyo gigo duto!

¹⁹ Bende ing’eyo kuma ler aye? Koso bende ing’eyo kuma ler chakoree?

²⁰ In inyalo nyisogi kuma onego gichopie, eka bang’e idwokgi kuma ne giwuokie?

²¹ Nyaka bed ni inyalo timo kamano, nikech hiki ng’eny ahinya, kendo ne onywoli kapok ochwe piny!

²² Bende isedhi kuonde keno ma akanoe pe,

²³ mondo obed moikore ni chieng’ lweny, kendo ni chieng’ masira?

²⁴ Bende isedhi kuma chieng’ thinyoree, kata kuma yamb ugue kudho ka wuokie?

²⁵ Ng’ano mane oloso kama koth luwo, ka dwaro chue, kendo mane oloso yo ma ludh koth luwo?

²⁶ En ng’a mamiyo koth chue kama onge ng’ama odakie?

²⁷ Koso en ng’a makelo koth e piny motwo, kendo mobaro okak mondo lum olodhie?

²⁸ Bende koth machue, kata tho mamoko e lum, nigi wuon-gi?

²⁹ Min pe to ng’a?

³⁰ Koso min koyo to ng’a, mamiyo pi poto matek ka kidi, kendo mamiyo nam bedo matek ka lwanda lawre?

³¹ In bende inyalo tueyo Yugni kanyakla, kata gonyo tol motueyo Rudhni kaachiel?.

³² Bende inyalo miyo Oluoro-Budho wuogi e sa moketne? Koso inyalo chiko Ratego e yo monego oluw?

³³ Bende ing’eyo chike marito kor polo, kata mana mago marito piny?

³⁴ Bende inyalo golo chik ni boche polo, mi imi giol kuomi koth maduong’?

³⁵ Ka igolo chik ni polo mondo omil, to bende dobi iri mondo owachni ni oikore timo gimoro amora midwaro?

³⁶ En ng’a ma nyiso okok ndalo ma aora Nael biro mwomoe genge? Koso en ng’a manyiso thwon gweno ni koth biro chue?

³⁷ Ng’ano mariek manyalo kwano boche polo, kendo manyalo leng’ogi mondo koth ochue,

³⁸ mi lok buru tombni tombni?

³⁹ Bende dinyal dwaro chiemo ni sibuor, mi ipidh nyithinde modenyo

⁴⁰ e kinde ma gipondo e gondgi?

⁴¹ En ng’a mamiyo agak chiemo, mondo odhi opidhgo nyithinde maywakna, kendo mathagore, ka kech kayo?