Ayub 37 - MUMA MALER 2015

¹ “An bende mor polo miyo chunya diko ni tikitiki.

² Un duto winjuru dwond Nyasaye, ma twaro ka mor polo.

³ En ema omiyo mil polo menyo kor polo duto, chakre tung’ piny konchiel nyaka komachielo.

⁴ Bang’e dwonde winjore komor matek gi dwol mar duong’ne, to seche duto polo mil amila.

⁵ Nyasaye chiko gik malich mondo otimre. Gin gik miwuoro ma dhierowa ng’eyo.

⁶ Ochiko pe mondo ogo piny, kendo okelo koth machue maduong’.

⁷ Oloro ni ji e udi, kendo ochungo tije dhano mane ochueyo, mondo dhano ong’e ni en ema koro otiyo tijene.

⁸ Le mae thim dhiyo e gondgi, kendo nindo kuno.

⁹ Yamb ahiti biro koa yo milambo, kendo koyo mang’ich thi wuok yo nyandwat.

¹⁰ Much Nyasaye miyo pi lokore pe kendo koda ka nembe poto, mi dok matek ka lwanda.

¹¹ Polo mil gie boche polo,

¹² kendo gilworore kaka Nyasaye dwaro. Gitimo gimoro amora ma Nyasaye ochiko, kuonde duto e piny ngima.

¹³ Ndalo moko Nyasaye kelo koth e piny mondo okumgo ji, to ndalo moko okele mondo onyisgigo kaka oherogi.

¹⁴ Ayub, ter mos matin, mondo iwinji. Parie gik mabeyo malich ma Nyasaye timo.

¹⁵ Bende ing’eyo kaka Nyasaye golo chik, kendo polo mil gie boche polo?

¹⁶ Koso bende ing’eyo kaka boche polo huyo e kor muya, ma nyiso rieko miwuoro mar Nyasaye?

¹⁷ Ooyo, e kinde ma yamo maliet kudho, kendo miyo piny bedo marach, to inyalo mana thagori, ka luya chami.

¹⁸ Bende dikony Nyasaye yaro polo, mi obed matek ka mula mothedhi?

¹⁹ Ara, puonjwa ane gima onego wawach ni Nyasaye, nimar wiwa ni nono, kendo wakia gima onego wawachi.

²⁰ An to, ok anyal kwayo Nyasaye mondo owe alosi, nikech mano dimi otieka chuth.

²¹ To koro yamo osekudho, mi polo olendo, omiyo wang’ chieng’ charo wang’wa, ma ok wanyal range tir.

²² Kor polo ma yo nyandwat otimo koche makwar, kendo mano nyisowa duong’ malich mar Nyasaye.

²³ Teko mar Nyasaye duong’ ma ok wanyal sudo machiegni kode. En jaratiro, kendo ong’ado ni ji bura makare.

²⁴ Mano emomiyo ji duto oluore, kendo ok odew jogo maparo ni nigi rieko.”