Ayub 30 - MUMA MALER 2015

Ayub ywago chandruok ma en-go

¹ “To tinde koda ka joma tindo jara. Wuonegi to joma nono, mane ok nyal yienigi kata mana konyo guogi rito jamba.

² Ne gin joma tekregi oserumo, kendo manyap, ma ok nyal timona gimoro.

³ Ne gidhier malich, kendo gidenyo, mi ne gimwodo tiende yien motwo gotieno e thim kuonde machil.

⁴ Ne ging’wedo buya mae thim, to gichamo. Tiende yien maonge ndhadhu bende ne chiembgi.

⁵ Ji ne riembogi gi mahu, mana kaka iriembo jakuo.

⁶ Ne ochunogi ni nyaka gidag mana e buche mane nie tik gode kod kuonde ma kamago.

⁷ Ne giywak oko kuonde moyugno mana ka ondiegi, ka gichokore kanyakla e tiend bunge.

⁸ Gin joma ofuwo ma onge nying, mane oriemb oko e pinygi.

⁹ To koro gin ema gibiro ka, kendo ginyiera,’ kendo achalonigi mana ka gima itugogo.

¹⁰ Gisin koda, kendo giparo ni giber moloya, bende gihedhore ng’udho wang’a olawo.

¹¹ Gimwomore kuoma gi mirimbgi duto, nikech Nyasaye osemiyo abedo mayomyom, kendo aonge gi teko.

¹² Oganda mar joma nonogi monja gi kanyima, kendo giriemba gi ng’uech ka giikore mar monja mogik.

¹³ Gigeng’ona yo, ka gidwaro tieka chuth, to onge ng’ama tamogi.

¹⁴ Gimwomore kuoma ka gikadho kuonde ma ohingana ruomborego.

¹⁵ Kihondko dwaro nega, kendo duong’na olal ka yamo. Mwanduna bende oseduono ka boche polo.

¹⁶ Koro chunya dwaro wuok, kendo onge gima nyalo tiekona rem.

¹⁷ Otieno to chokena muodore, kendo rem machamano ok nyal kue.

¹⁸ Nyasaye ngwana gi ng’uta, mi lepa jowre marach.

¹⁹ Owita piny e chuodho, mi alokora buru.

²⁰ Yaye Nyasaye, aluongi, to ok idwoka, kendo kata ka alami to ok idewa.

²¹ Ilokori jasika, kendo isanda gi tekri duto.

²² Iuka ka gima yamo tera, kendo iudha e yamo mang’ongo.

²³ Ang’eyo ni idwaro tera e tho, kuma ji duto ochomo.

²⁴ Ere gima omiyo imonjo ng’ama orumo, ma ok nyal timo gimoro, to mana makwayo ni mondo okeche?

²⁵ Donge ne aywago joma thagore, kendo chunya ne lit ka aneno joma nigi chandruok?

²⁶ Ne ageno yudo mor kod ler, to thagruok kod mudho ema ne obirona.

²⁷ Iya nyawni, kendo aonge gi kue. Onge gimoro modong’na, mak mana thagruok.

²⁸ Awuotho e mudho, kendo chieng’ ok rienyna.

²⁹ An owadgi ondiegi, kendo tula e osiepna.

³⁰ Denda oselokore rateng’, kendo opokore, midhusi bende ohinga.

³¹ Kuma ne awinjoe thum mamit, tinde ywak gi pi wang’ ema nitie.