Ayub 27 - MUMA MALER 2015

Ayub onyiso pok ma joricho yudo

¹ Ayub ne omedo wacho niya,

² “Akuong’ora e nyim Nyasaye Mangima Manyalo Gik moko Duto, motamore ng’adona bura makare, kendo mosemiyo chunya obedo malit,

³ ni, e kinde duto moweya ka angima,

⁴ to dhoga ok nowach gimoro marach, kendo lewa ok nomul miriambo.

⁵ E ndalo duto ma pod angima, ok nayie ni wecheu ni kare, to nasik kawacho ni aonge gi ketho.

⁶ Ok nawe mak awacho ni an kare, nimar ang’eyo ni aler.

⁷ Mad jogo duto ma piem koda yud kum mana ka joricho.

⁸ Ere geno ma joma ok gen Nyasaye dibedgo, e sa ma Nyasaye dwaro negogie?

⁹ Koso Nyasaye diwinj ywakgi ka chandruok omakogi?

¹⁰ Ne onego ginyis ni giyudo mor kuom tiyo ni Nyasaye, bende nonego gibed ka gilame pile!

¹¹ Koro we mondo apuonjue kaka duong’ mar Nyasayee romo, kendo mondo anyisue gima Ng’ama Nyalo Gik Moko Duto osechano.

¹² To bende kata ka ok anyisou, to useneno gi wang’u, koro ere gima omiyo uwacho weche manono?

¹³ Winjuru kaka Nyasaye Manyalo Gik Moko Duto kumo joricho kod joma timo timbe mahundu.

¹⁴ Nyalo bet ni gin gi yawuowi mang’eny, to giduto ginitho e lweny, kendo nyithindgi bende ok noyud chiemo moromogi.

¹⁵ Eka tuo to noneg joma otony e lweny kata ma kech ok onego, kendo mondgi ok noywaggi.

¹⁶ Jaricho nyalo bet gi pesa mang’eny ka lowo, kendo nyalo bet gi lewni mogundho ma okia kar kwan-gi,

¹⁷ to lepego ng’at moro makare ema biro rwako, kendo ng’at moro ma onge ketho ema biro kawo pesanego.

¹⁸ Joricho gero udi, to utgigo ok nyal dak. Girumo piyo mana ka mbuwi kata ka kiru.

¹⁹ Chieng’ moro nindo notergi kapod gimew, to ka gichiew, to giniyud ka mwandugi oselal.

²⁰ Masira nomakgi ka ohula motucho apoya, kendo yamb otieno nokegi mabor.

²¹ Adier, yamb ugue noywergi ka gologi e miechgi.

²² Enokudh kuomgi matek, ma ok oweyonigi thuolo, kendo kata obedo ni ginitem kaka ginyalo mondo gitony,

²³ to yamo nokudh kuomgi ka giringo, kendo tekone malich nomi kihondko makgi.