Ayub 26 - MUMA MALER 2015

Ayub owacho ni Nyasaye ema nigi loch

¹ Eka Ayub nodwoke niya,

² “Mano konyruok manade misechiwo ni ng’at modhier ma onge teko!

³ Ing’adona rieko maber miwuoro, kendo iyie puonjo ng’ama ofuwo ka an kama!

⁴ To ere ng’ama iparo ni biro winjo wechenigi duto? Koso ng’ama oori mondo ilos kamano?

⁵ Piny Joma Otho tetni, kendo joma odak kuno, luoro omako.

⁶ Adier, Piny Joma Otho, Nyasaye neno, kendo onge gima mone nene.

⁷ Nyasaye noyaro polo ma yo nyandwat, mi ong’awo piny e kor muya.

⁸ Nyasaye ema pogo boche polo gi pi, kendo omono pek mar pigno yiecho bochego.

⁹ Omiyo boche polo imo due marieny maler.

¹⁰ Ne ogoro laini alwora e nam, mopogogo ler gi mudho.

¹¹ Ka omiyo polo omor, to mise mag polo tetni ka gima luoro omakogi.

¹² Tekone ema ne okweyogo nam, kendo riekone ema ne otiekogo Rahab ma ondieg nam.

¹³ Muche ema ne omiyo polo olendo, kendo lwete ema ne onego ondiek ma ne oyudo ringo tony.

¹⁴ To mago gik manyiso mana dir tekone kende, kendo gin mana weche manok miwacho kuome. To koro en ng’awa ma nyalo ng’eyo duong’ hie mar Nyasaye.”