Ayub 24 - MUMA MALER 2015

¹ “Ere gima omiyo Nyasaye ok oketo chieng’ ma ing’adoe bura ni joma ong’eye?

² Joma timbegi richo ketho kiew mondo oyud lowo madongo, kendo gikwalo rombe mi gimedo gi jambgi.

³ Bende gikwalo kenje mag nyithi kiye, kendo gimako rwadh chi liel, ka gir singo kuom gik moholo.

⁴ Gimono joma odhier yudo adiera monego giyudi, kendo gimiyo joma odenyo ringo pondo.

⁵ Kuom mano, joma odhier manyo chiemo e thim, mana ka kanj thim. Onge kamachielo ma ginyalo yudoe chiemo ni nyithindgi.

⁶ Ichunogi kayo puothe ma ok maggi, kendo gipono olemo e puothe joricho.

⁷ Otieno to ginindo ka gionge gi gima giumrego, kata ma digigeng’go koyo.

⁸ Koth maa e gode rodhogi, kendo gipadore e dier lwendni mondo giyudie resruok.

⁹ Joricho loko nyithi kiye wasumbni, kendo gikawo nyithind joma odhier kar gope.

¹⁰ To joma odhier wuotho duge, kendo ka gikayo cham e puoth jomoko, to kech kayogi.

¹¹ Gibiyo zeituni ka giloso mo, kendo gibiyo mzabibu ka gilosogo divai ka riyo negogi.

¹² Ka idhi e mier, to iwinjo ywak joma ohiny, kendo ma tho, to Nyasaye ok dew lemogi!

¹³ Nitie ji ma ok dwar ler. Ok giwinj tiende, kendo gitamore luwo kama orienyie.

¹⁴ Janek dhi nego ng’ama odhier ka pok piny oyawore. Otieno to odhi mecho.

¹⁵ Ng’at ma ja terruok rito mondo piny oimre, kendo opando wang’e mondo kik ng’eye.

¹⁶ Jokuo turo udi gotieno, odiechieng’ to gipondo, kendo ok gidwar neno ler.

¹⁷ Giluoro ler mar odiechieng’, to mudho ema gihero.

¹⁸ “Uwacho ni, ‘Ohula yweyo ng’at ma jaricho, kendo Nyasaye okuong’o puothe, omiyo tinde ok odhi oti e puothene mag mzabibu.

¹⁹ Jaricho duono nono e piny ma ji odakieni, mana kaka pe duono ka chieng’ rieny e ndalo oro.

²⁰ Onge ng’ama pare, kata mana min mare bende wiye owil kode, kudni chame kendo orumo chuth.’

²¹ Mano timore nikech ne osando mond liete, kendo ne ok okecho mon ma onge nyithindo.

²² Nyasaye tieko joma rateke gi tekone, kendo omiyo joricho tho.

²³ To kata obedo ni Nyasaye oweyogi gibedo mangima kamano, to orangogi seche duto.

²⁴ Joricho dhi maber kuom kinde manok kende, to bang’e giner ka buya mopudhi kata ka tiang’ motong.

²⁵ Bende ng’ato nyalo kwer ni mano ok kamano? Koso ng’ato dinyis malong’o ni wechena ok gin adier?”