Ayub 23 - MUMA MALER 2015

Ayub dwaro tero ywakne e nyim Nyasaye

¹ Ayub nodwoko niya,

² “Pod adagi adaga, kendo aywak nikech Nyasaye ema hinya. Ok anyal weyo mak achur.

³ Mad bed ni ang’eyo kuma dayudie Nyasaye, kendo ni ang’eyo kaka dadhi ire,

⁴ to dawach wechena e nyime, kendo damul weche duto ma achwakorago.

⁵ Adwaro ng’eyo gima dowachi, kendo kaka dodwoka.

⁶ Bende Nyasaye digoya gi mbi, mi uth bucha? Ooyo, ang’eyo ni dowinj wachna.

⁷ An jaadiera, omiyo dadimb wach ni Nyasaye, kendo dowach ni aonge ketho chuth.

⁸ Asemanyo Nyasaye yo wuok chieng’, to oonge kuno. Bende kane amanye yo podho chieng’, to ne ok ayude.

⁹ Nyasaye osebedo ka tiyo yo nyandwat, kendo yo milambo bende osedhiye, to pok anene.

¹⁰ To kata kamano, ong’eyo gimoro amora ma atimo, kendo ka oranga, to obiro yudo ka aler.

¹¹ Yor Nyasaye ema aluwo gi chunya duto, kendo ok abar korachwich kata koracham.

¹² Pile atimo mana gima Nyasaye ochiko. Adier, aluwo mana dwarone, to ok gik ma an ema adwaro.

¹³ Ok olokre, to bende onge ng’ama dipiem kode, kata ma ditame timo gima odwaro.

¹⁴ Obiro timo gima osechanona. Mano en mana gimoro achiel kuom gik mang’eny ma ochanona.

¹⁵ Omiyo ka aparo ni abiro chung’ e nyime, to atetni ateta, kendo luoro nega.

¹⁶ Nyasaye Ma Nyalo Gik Moko Duto oseketho chir mane an-go. En mana Nyasaye ema miya luoro, to ok mudho, kata obedo ni mudho dino wang’a kamano.