Ayub 22 - MUMA MALER 2015

Elifaz owacho ni Ayub nigi richo madongo

¹ Eka Elifaz nodwoko niya,

² “Bende dhano nyalo konyo Nyasaye adier, kata da bed ni oriek manadi?

³ Ere gima Nyasaye yudo, kata ka in ng’at makare? Koso iparo ni kidimbori, to mano konye gang’o?

⁴ Kik ipar ni Nyasaye kumi kendo yali nikech iluore!

⁵ Ooyo, okumi mana nikech isetimo richo mang’eny ahinya, kendo mana nikech timbeni maricho okadhore.

⁶ Ne ikawo lep owadu, mi iweye duk, ni eka mondo ochuli pesa mane oholo kuomi.

⁷ Joma riyo oloyo, ne ituono pi mondo omodhi, bende ne itamori miyo joma odenyo chiemo mondo ocham.

⁸ Ne ikonyori gi tekoni ma in go kod duong’ni, mi ikawo piny duto.

⁹ Ok en mana ni ne idagi konyo mond liete kende, to nyithi kiye bende ne ithago, kendo imayogi gik mane gin go.

¹⁰ Mano omiyo masiche olwori koni gi koni, kendo ipo nono ka luoro ohewi.

¹¹ Piny olokore mudho ma ok inyal neno gimoro, kendo ohula oyuoyi.

¹² Donge Nyasaye odak e polo kuma bor moloyo, kendo orango sulue mana e bwoye, kata obedo ni gin mabor kamano?

¹³ To eka in to pod ipenjo ni, ‘Nyasaye ong’eyo ang’o?’ Bende ni, ‘Ere kaka onyalo yalowa, to boche polo oime?’

¹⁴ Iparo ni boche polo motimo rumbi nyalo mone neno, kowuotho e kind polo gi piny?

¹⁵ Par ane yore ma joma timbegi richo osebedo ka luwo.

¹⁶ Joma luwo yore ma kamago tho ka pok ndalogi ochopo, ka gima ohula oyuoyogi.

¹⁷ Gin e joma ne odagi Nyasaye, kendo mane paro ni ok onyal kumogi.

¹⁸ To eka Nyasaye nogo ema oseguedhogi gi mwandu! An ok anyal ng’eyo gima ji ma timbegi richo paro!

¹⁹ Ka joma beyo oneno ka ikumo joma timbegi richo, to gibedo mamor, kendo joma onge ketho bende nyiero.

²⁰ Mwandu duto mag joricho okethi, kendo mach wang’o gimoro amora modong’.

²¹ Koro in Ayub, winjri gi Nyasaye, mondo iwe kwane ka jasigu.

²² Ka itimo kamano, to obiro guedhi. Winj puonjne, kendo imak wechene e chunyi.

²³ Adier, nyaka iduog ir Nyasaye kibolori, kendo itiek timbe maricho manie dalani.

²⁴ Wit dhahapi kucha. Ee, wit kata mana dhahapi maler e chuoth aora moduono.

²⁵ Mondo Nyasaye Manyalo Gik Moko Duto obed dhahapi, kendo obed fedha modhurni tuche tuche.

²⁶ Bang’e ibiro geno kuom Nyasaye pile, kendo ibiro yudo ni en e tiend mor ma in go.

²⁷ Ka ilemo, to obiro winji, kendo inichop singruok duto mane itimo.

²⁸ Gimoro amora michano timo, nodhi maber.

²⁹ Nyasaye tieko josunga, to oreso joma obolore.

³⁰ Obiro resi ka ionge gi ketho, kendo ka itimo gima kare.”