Ayub 21 - MUMA MALER 2015

Ayub owacho ni joricho ema yudo mwandu

¹ Ayub nodwoko niya,

² “Chikuru itu mondo uwinj gima awacho, nikech mano ema dimi abed mamor.

³ Miyauru thuolo mondo awuo, to ka asetieko, to unyalo chara achara kaka uhero!

⁴ An dhano aongego gi wach, to nitie gimoro ma maya kue.

⁵ Ranguru ane ka ok ubi bwok, mi dhou moki!

⁶ Ka aparo gik mosetimorena, ang’eng kendo denda duto kirni.

⁷ Ere gima omiyo Nyasaye weyo joricho dak aming’a kendo dhi maber?

⁸ Nyithindgi gi nyikwagi dongo mana e wang’gi.

⁹ Nyasaye ok kel chandruok e miechgi, omiyo gidak adaka gi kue, ma onge gima bwogogi.

¹⁰ Adier, jambgi duto iluwo maber, kendo ginywol ma ok gibwogi.

¹¹ Nyithindgi ringo kendo tugo ka nyiroye,

¹² bende gimielo thum kod asili.

¹³ Piny dhi kodgi maber, kendo githo gi kue

¹⁴ Joricho okwero Nyasaye niya, ‘Wewa! Ok wadwar ng’eyo yoreni.

¹⁵ In ng’a, ma dwatini? Koso ere gima dwayud kwalami?’

¹⁶ Giwacho ni giyudo gik moko duto gi tekregi. An to ok anyal yie gi parogino.

¹⁷ Joricho manok kende ema tho piyo, kendo matin kende ema yudo masira. Bende Nyasaye osekumo joricho gi mirima adier,

¹⁸ mi okeyogi ka mihudhi ma yamo tero, kata ka buru ma yamo kudho?

¹⁹ Uwacho ni Nyasaye kumo nyithindo kuom richo wuonegi. Ooyo, Nyasaye mondo okum akuma joricho kendgi, konyisogo ni otimo kamano nikech richo jogo giwegi.

²⁰ Adier, joricho mondo okum kuom richogi giwegi, eka ging’e mirimb Nyasaye.

²¹ Ka ng’ato ndalone orumo, motho, to bende dodew adier ka nyithinde neno maber?

²² Bende dhano dipuonj Nyasaye adier? Koso bende doyal Ng’ama Duong’ Moloyo?

²³ Ji moko bedo mangima, kendo ok gituo nyaka githo.

²⁴ Gimor kendo gidak gi kue, bende dendgi ber.

²⁵ Ji moko to ok ne maber e ngimagi duto, kendo githo ka chunygi lit.

²⁶ To kata kamano ji duto tho machalre, mi yiki, kendo kudni nur kuomgi!

²⁷ Ang’eyo parou, kendo ang’eyo gik maricho mudwaro hinyago.

²⁸ Ubiro penja ni, tinde ere dala ng’at maduong’ mane timo timbe maricho?

²⁹ To un, pok uwuoyo gi joma wuotho e pinje mamoko koso? Donge usewinjo ka giwacho ni,

³⁰ e kinde ma Nyasaye okecho kendo kumo ji, to joricho ema dong’ mak okum?

³¹ Onge ng’ama donjo ni jaricho kendo ma kume moromo gi gik maricho duto mosetimo.

³² Ka oting’e kitere e liel,

³³ to ji gana gi gana kowe, kendo kata mana lowo lwar kuome mos. Liende bende jorit rito arita.

³⁴ Omiyo weche mutemo hoyago gin weche manono, kendo gik moko duto musewacho gin mana miriambo!”