Ayub 20 - MUMA MALER 2015

Zofar onyiso kum ma joricho yudo

¹ Eka Zofar nowacho niya,

² “Ayub, gima iwacho owang’o iya, omiyo koro adwaro dwoki piyopiyo.

³ Asewinjo kiyanya malit, to koro ang’eyo kaka onego adwoki.

⁴ Ing’eyo malong’o ni chakre kinde mane okwong keto dhano e piny,

⁵ onge jaricho mosebedo mamor aming’a, kendo ilo mar ng’at ma ok dew Nyasaye rumo piyo.

⁶ Kata obedo ni osungore mi ochop nyaka e polo, kendo kata obedo maduong’, ma wiye geyo mana boche polo,

⁷ to achien noyweye oko mana ka buru, mi olal nono. Joma ne ong’eye nowuor kuma odhiye.

⁸ Enoduon ka buoyo, kendo nolal nono ka lek, mi ok nonene kendo.

⁹ Wenge mane onene ok nochak onene, nikech noa chutho kuma ne oyudo odakie.

¹⁰ Yawuote nyaka dwok gik mane okwalo kuom joma odhier. Adier, nyithinde nyaka dwok mwandu mane okawo.

¹¹ Dende pod ber, kendo chwe, to piyopiyo nono obiro lokore buru.

¹² Richo mitne, omiyo okano moko e lembe,

¹³ mana ka ng’at mokano chiemo e dhoge mondo owinj ndhathe.

¹⁴ To chiemono lokore makech e iye, mana ka kwiri.

¹⁵ Nyasaye miyo jaricho dwoko mwandu ma osekwalo, mana ka ng’ama ng’ogo gima osechamo.

¹⁶ Gima jaricho omwonyo chalo kwiri kendo nege mana ka gima thuol ema okaye.

¹⁷ Ok obi dak mondo one mor zeituni gi chak kod mor kich mamol ka aore,

¹⁸ to obiro weyo gik moko duto ma osebedo ka otiyone, kendo ok obi yudo thuolo ma ochamogo mwandune,

¹⁹ nikech ne othiro joma odhier kendo ojwang’ogi, mi omayo jomoko nono utgi.

²⁰ Wuoche nokadhore,

²¹ omiyo kane ochiemo, to gimoro ok dong’ e tape. To koro sani gige oserumo.

²² Kata gik mang’eny opong’o dalane kamano, to achien none chandruok malich.

²³ We ocham achama gik moko duto modwaro! Nyasaye biro kume gi mirima mager.

²⁴ Ka otemo ringo mondo oyomb ligangla mar nyinyo, to asere mar mula chwowe.

²⁵ Ee, asere goye mbure, kendo kama lew asere opowo, remo chwerie, omiyo kihondko dwaro nege.

²⁶ Gik moko duto mane osekano lal nono. Mach ma lwet dhano ok omoko ema wang’e kaachiel gi joode duto.

²⁷ Polo nyiso richo mag ng’atni. Piny bende donjone.

²⁸ Mirimb Nyasaye biro mwomo ka ohula, mi keth mwandune duto.

²⁹ Mano e kum ma Nyasaye miyo joricho. Ee, mano e pok moketonigi.”