Ayub 2 - MUMA MALER 2015

¹ Kane kinde ochopo ma yawuot polo ochako obiroe e nyim Ruoth Nyasaye, Satan bende ne ni kodgi.

² Ruoth Nyasaye nopenjo Satan ni, “Ia kanye?” Satan nodwoke ni, “Asebedo ka abayo abaya e piny, ka alworora koni gi koni.”

³ Ruoth Nyasaye ne ochako openje niya, “Bende inenoe Ayub jatichna? Onge ng’at makare kendo maler kaka en e piny ngima, moluora kendo motang’ ni richo. Ne imiyo ayieni mondo iteme kayiem nono, to kata kamano pod ok oketho.”

⁴ To Satan nodwoko ni, “Dhano nyalo yie weyo gimoro amora ma en go mana ni mondo obed mangima.

⁵ To koro temie kimulo dende ane, ka dang’ ok okuong’i!”

⁶ Mano omiyo Ruoth Nyasaye nowacho ni Satan niya, “Kara ber, koro ero akete e tekoni mondo itimne gima idwaro, to kik inege.”

⁷ Bang’ mano, Satan nowuok oa e nyim Ruoth Nyasaye mi odhi ogoyo Ayub gi tuoche buche, mokuodo dende chakre lith tiende nyaka paw wiye.

⁸ Ayub nodhi mobet e buch kendo, mi okawo mbalatago mondo ogwonyrego.

⁹ Eka chiege nopenje niya, “Pod iyie ayiea kuom Nyasachi? Ere gimomiyo ok inyal yanye mondo itho?”

¹⁰ To Ayub nodwoke niya, “Iwuoyo mana kaka dhako mofuwo wuoyo. Ka Nyasaye okelonwa gima ber, to wakawo. Koro ere gimomiyo wang’ur kokelonwa chandruok?” Kuom mano, kata obedo ni Ayub nosechandore malit kamano, to ne ok oketho dhoge.

Osiepe Ayub obiro mondo oho chunye

¹¹ Osiepe Ayub adek, ma Elifaz ja-Teman gi Bildad ja-Shua kod Zofar ja-Nama nowinjo kaka Ayub osebedo gi thagruok. Omiyo ne giparo ni mondo gidhi gilime, kendo giho chunye.

¹² Kane gikwongo nene, kapod gin mabor kode, ne ok ginyal ng’eye. To kane ging’eye, ne gichako ywak malit, mi giyiecho lepgi kendo gibuko wigi buru.

¹³ Bang’e ne gibet e lowo kanyo kode kuom ndalo abiriyo odiechieng’ gotieno, ka ok giwuo nikech ne gineno kaka othagore malit.