Ayub 19 - MUMA MALER 2015

Ayub pod geno ni Nyasaye biro yie ni en ng’ama kare

¹ Ayub nodwoko niya,

² “Nyaka karang’o ma ubiro miyoe chunya bedo malit gi wecheu mang’enygi?

³ Kinde ka kinde uwang’o iya, kendo ok une wichkuot ka uyanya.

⁴ Kapo ni atimo marach, to mano hinyou nadi?

⁵ Uparo ni uber moloya, kendo uparo ni thagruokna nyiso ni an jaketho.

⁶ To Nyasaye ema oseng’adona bura ma ok ni kare, kendo en ema ochikona obadho mondo amokie!

⁷ Ka agoyo nduru ni onega, to onge ng’ama dewo. Kata ka adwaro bura makare, to ok anyal yudo.

⁸ Nyasaye osedinona yo, mi ok anyal kadho, kendo osemiyo mudho oimo yorena.

⁹ Osekawo mwanduna duto, kendo oketho nyinga.

¹⁰ Ogoya koni gi koni, mi arumo. Kaka ng’ato pudho yath, mi kethre, e kaka Nyasaye oseketho geno mane an go.

¹¹ Nyasaye osekecho koda malich, kendo omon koda mana ka jasike.

¹² Ooro jolwenje mondo oked koda, kendo gilworo hemba koni gi koni mondo gimonja.

¹³ Owetena oseweya, kendo osiepena duto koro ok dwara.

¹⁴ Wedena gi joma ohera oseweya mi odhi.

¹⁵ Joma ne bedo welo e oda, wigi osewil koda, kendo kata nyiri mane tiyona okawa mana ka ng’ama wendo.

¹⁶ Ka aluongo jatichna moro, to ok odwoka, kata ka ahombe ni mondo okonya, to ok oyie.

¹⁷ Chiega ok dwar winjo tikna, kendo kata mana ominena hie ok nyal sudo buta machiegni.

¹⁸ Nyithindo jara, kendo ka ginena, to ginyiera.

¹⁹ Osiepena mane ageno ahinya, osin koda, kendo joma nyocha ahero gi chunya duto koro ringa.

²⁰ Adong’ choke lilo, kendo koro aliero mana e lak tho.

²¹ Yaye un osiepena, ywagauru, nimar lwet Nyasaye oseketa piny.

²² Ere gima omiyo un bende usanda mana kaka Nyasaye sanda? Donge usesanda moromo?

²³ Mad ng’ato yie ndik weche ma awacho e kitabu,

²⁴ kata gor wechenago gi tindo e kor lwanda mondo osik nyaka chieng’.

²⁵ To ang’eyo ni ng’ato nitie e polo, ma nobi mondo ochwaka chieng’ giko.

²⁶ Kata ka tuo oketho denda kamano, to e ringruokni anane Nyasaye.

²⁷ Ee, ananene gi wang’a awuon.

²⁸ Chunya ne otho nikech nuwacho niya, ‘Ere kaka dwasande?’ Adier, ne udwaro yore ma dukedgo koda.

²⁹ To koro luoruru ligangla ma ochomou, nimar en ligangla ma Nyasaye kumogo richo, eka mondo ung’e ni nitie Jal mang’ado bura!”