Ayub 18 - MUMA MALER 2015

Bildad onyiso gima biro timore ni joricho

¹ Eka Bildad nodwoke niya,

² “Ayub, ji machal kodi ok nyal ling’ koso? Ka da bed ni inyalo ling’, to da waloso kodi.

³ Ang’o momiyo iparo ni wafuwo ka dhok?

⁴ Mirima ma in godono hinyi mana in iwuon! Iparo ni ji duto biro rumo e piny mana nikech in? Koso ni gode biro mukore nikech wecheni?

⁵ Ng’at ma timbene richo biro nego tache, kendo maye ok nochak oliel.

⁶ Ee, taya manie hembe ibiro nego.

⁷ Chon nowuotho motegno, to tinde oywayo wuoth. Riekone owuon ema omiyo opodho.

⁸ Osenyumore e gogo, mi tiendene omoko.

⁹ Ee, obadho omako ofunj tiende matek, ma ok onyal bwodho.

¹⁰ Osechikne otego e wang’yo ma oluwo.

¹¹ Masira bwoge koni gi koni, kendo lawe sa duto.

¹² Chon ne en gi mwandu, to tinde oonge kata mana gi chiemo, kendo masira rite arita.

¹³ Tuo marach omako dende duto, kendo miyo bedene kod tiendene kethore.

¹⁴ Ogole oko e ode mane odakie gi kue, kendo iywaye kitere e tho.

¹⁵ Koro ng’ato ang’ata nyalo dak e odeno, ka osekir yath e iye mondo otiek tuo mantie.

¹⁶ Jarichono chalo gi yath ma tiendene otwo kendo bedene oner.

¹⁷ Humbe orumo e piny, kendo nyinge olal ma onge ng’ama paro.

¹⁸ Ibiro riembe e piny ma ji odakieni, mi oa e ler, odhi e mudho.

¹⁹ Ok nowe nyikwayo ma dichung wiye, bende oonge gi joge ma odong’.

²⁰ Ka joma odak yo wuok chieng’ owinjo gima otimoreneno, to gibwok. Joma odak yo podho chieng’ kowinjo kamano, to luoro mako.

²¹ Mano e gima timore ni joma timbegi richo ma ok dew Nyasaye.”