Ayub 17 - MUMA MALER 2015

¹ “Ndalona oserumo, kendo aonge gi kue. Onge gima odong’na mak mana tho!

² Chunya lit ka aneno kaka ji tugo koda seche duto.

³ A Nyasaye, awacho adiera, omiyo yie wachna, nimar onge ng’at machielo ma nyalo yie gima awacho.

⁴ Isedino parogi mondo kik ging’e adiera, omiyo koro kik iwe gigona siboi.

⁵ Ngero moro wacho niya, ‘Ka ng’ato ondhogo jowetene kuom wach pesa, to kethoneno nyaka dog e wi nyithinde.’

⁶ To koro an ema gigoyona ngerono! Omiyo ka ji owinjo kamano, to gibiro ira, kendo ging’udho wang’a olawo.

⁷ Kuyo ma an go odino wang’a ma ok anyal neno, kendo bedena gi tiendena odong’ mana choke.

⁸ Ji maparo ni gin joadiera kibaji omako, kendo giduto giwacho ni aonge gi Nyasaye.

⁹ Bende ji maparo ni gin joma ogen medo neno ni adier gin ema gin kare.

¹⁰ To ka da giduto gibi, mi gichung’ e nyima, to ok da ayudo kata achiel kuomgi ka riek.

¹¹ Ndalona oserumo, kendo chenona duto osekethore, bende koro onge gima ageno.

¹² Osiepena to wacho ni otieno en odiechieng’, kendo ni ler ni machiegni, kata obedo ni an e mudho kamano.

¹³ Aonge gi geno, kendo abiro dak mana e Piny Joma Otho, kuma abiro rierae piny mondo anindi e mudho.

¹⁴ Ka awacho ni liel ni, ‘In e wuora,’ kata ka awacho ni kudni machamagi ni, ‘Un mama gi nyiminena,’

¹⁵ to koro ere kuma genona dibedie, koso ere ng’ama ding’e ni an gi geno?

¹⁶ Ka iyika e bur, to geno ma an-go ok didhi koda e Piny Joma Otho.”