Ayub 15 - MUMA MALER 2015

Elifaz okwero Ayub

¹ Elifaz nodwoko niya,

² “Mago weche manono, Ayub! Iwacho mana weche maonge tich!

³ Onge ng’ama riek manyalo wuoyo kaka iwuoyono, kata manyalo temo resore gi weche manono kamano.

⁴ Inyoso chuny ji mondo kik luor Nyasaye kendo imonogi lame.

⁵ Iwuoyo kamano nikech ing’eyo ni in jaricho, kendo idwaro mana wuondowa gi weche mamit.

⁶ An ok anyal ng’adoni bura, nikech weche miwacho ema nyiso ni in jaketho.

⁷ Iparo ni in e ng’at mane okwong nywol? Koso ne intie ka pok ne Nyasaye ochueyo gode?

⁸ In ne in kanyo, miwinjo ka Nyasaye chano gik mobiro timo? Koso in kendi ema in gi rieko?

⁹ Onge gima ing’eyo ma wan ok wang’eyo.

¹⁰ Ne wayudo rieko kuom jodongo madongo, mane onywol kapok onywol wuoru.

¹¹ Ichayo hoch ma Nyasaye hoyigo, kaachiel gi weche mamuol ma isewinjo koso?

¹² Ang’o momiyo ikecho, kendo ijwolo wang’i,

¹³ ka mirima omaki gi Nyasaye, kendo ikwede gi weche mathoth?

¹⁴ Bende nitie ng’at maler chutho adier? Koso bende nitie ng’at malong’o e wang’ Nyasaye?

¹⁵ Ka Nyasaye ok nyal geno kata mana malaika mage, kendo joma odak e polo bende nenore mana ma ok ler,

¹⁶ to koro ere kaka dogen dhano man gi timbe modwanyore motow, kendo magado richo mana ka pi?

¹⁷ Koro in Ayub, winj gima an ang’eyo:

¹⁸ Joma riek osepuonja adiera, mane kweregi onyisogi mak opandogi.

¹⁹ E ndalogo kwerewago ne odak mana kendgi e pinygi, ma onge jopinje mamoko ma gikikorego, ma dimi giwe Nyasaye.

²⁰ Ng’at ma timbene richo kendo mathiro jowadgi noyud chandruok e kinde duto mag ngimane.

²¹ Koko mag masiche biro mor e ite, kendo jomecho biro monje mi yake e kinde moparo ni enie gi kue.

²² Oonge gi geno mar wuok e chandruok, nimar ong’eyo ni tho okiye,

²³ kendo ni achudhe rito mondo ocham ringre. Ng’at ma kamano ong’eyo ni ngimane otimo mudho.

²⁴ Masira marach omake apoya, kendo chandruok gi paro malit oime, mana ka gima ruoth maratego ema omonje.

²⁵ Mano e gima notimre ni ng’at ma kamano, nikech othiano ni Nyasaye, kendo osepiem gi Ng’ama Nyalo Gik Moko Duto.

²⁶ Ng’at ma kamano en jasunga, kendo wiye tek. Oyudho okumbane mana ka jalweny,

²⁷ kendo omwomore mondo oked gi Nyasaye.

²⁸ En ng’at mane omako mier madongo e lweny, kendo okawo udi mane wegi osedarie, to kata kamano lweny biro ketho miergo gi udigo chuth.

²⁹ Ok nobed jamoko kuom kinde mang’eny. Mwandu ma en go ok nodag aming’a. To kata mana tipone bende nolal nono.

³⁰ Kendo ok notony e masira. Enochal gi yath ma mach owang’o pote, kendo ma yamo okeyo thiepene.

³¹ Ka ogalore, mi ogeno kuom timbe manono, to timbene manono kende ema noyudi.

³² Obiro ner ka ndalone pok orumo, mana ka pot yath, mi ok nochak obed mang’ich.

³³ Enochal gi yadh mzabibu ma olembe lwar ka pok ochiek, kendo mana ka yadh zeituni ma ok nyag olemo.

³⁴ Ji ma ok dew Nyasaye ok nobed gi nyithindo, to bende udi moger gi gik moyud kuom asoya, mach nowang’ mi tiek pep.

³⁵ Mago e joma kelo chandruok, kendo timo timbe maricho. Chunygi opong’ gi miriambo kinde duto.”