Ayub 14 - MUMA MALER 2015

Ayub oywagore ni en dhano ma ndalone nok

¹ Ndalo dhano nok, kendo oneno thagruok mathoth.

² Odongo kendo onur piyo, mana ka maua, bende olal nono ka tipo makadho.

³ A Nyasaye, ng’at ma kamano bende dilokri, mi ing’i? Koso dikela e nyimi mondo iyala?

⁴ Onge gima ler ma diwuog kuom gima ochido ka dhano.

⁵ Kar romb hike nosechan chon. Ee, kata mana duechene bende ong’ere. In Nyasaye isechane, omiyo ok nyal loke.

⁶ Lok wang’i oa kuom dhano mondo iweye. Kata obedo ni ngimane tek kamano, to we one maber kaka onyalo.

⁷ Ka osetong’ yath, to nitie geno ni onyalo loth kendo.

⁸ Kata obedo ni tiendene top, kendo osikine tho ei lowo,

⁹ to kowinjo much pi, to oloth mana ka yien mochako dongo.

¹⁰ Dhano to tho, kendo mano e gikone, to ka osetho, to erego?

¹¹ Kata aora dipo ka chieng’ moro oduono, kendo kata mana nam bende pige nyalo rumo.

¹² Dhano to kosetho, to ok nyal chier kendo. Ok onyal chiew ka polo pok okethore, kendo gimoro ok nochiewe e nindoneno.

¹³ A Nyasaye, mad iyie ipanda e piny joma otho, mondo apond kuno nyaka mirimbi kue. Bang’e iket kinde ma ibiro parae kendo.

¹⁴ Ka ng’ato otho, to bende dochak obed mangima? An to abiro dhil gi thagruokna nyaka kinde maber chopi.

¹⁵ Bang’e iniluonga, to anadwoki, kendo inibed mamor kineno ng’at mane ichueyo.

¹⁶ Eka inirang kamoro amora ma anyono, to ok inidew richona.

¹⁷ Ibiro keto richona e ndede, mi idin mondo kik nen. Ee, ibiro rucho oko timbena duto mamono.

¹⁸ Kamoro dipo ka kinde obiro ma gode nyalo mukoree, kendo ma lwendni bende imukoe oko.

¹⁹ Pi nyalo loko lwendni, kendo ohula nyalo ywero lowo. Kamano e kaka iketho geno ma dhano nigo!

²⁰ To mogik, ihewo dhano chuth, kendo itere mabor, mi tho bam wang’e.

²¹ Kata bed mana ni yawuote yud duong’, to en ok ong’e, kata ka giyudo wich kuot, to ok one.

²² Rem mar dende kende ema owinjo, kaachiel gi kuyo mar chunye.”