Ayub 13 - MUMA MALER 2015

Ayub oywagore ni en ng’at makare

¹ “Gik moko duto ma uwacho ne asewinjo chon, kendo ang’eyogi pep.

² Gik mung’eyo ema an bende ang’eyo, omiyo ok uloya gi rieko.

³ Nyasaye ema an go gi wach, to ok un, kendo en ema adwaro yalo kode.

⁴ Un to, uumo adiera gi miriambo, omiyo uchalo jothieth ma ok nyal thiedho tuo.

⁵ Kudwaro nyiso ni uriek, to ling’uru aling’a!

⁶ Koro chikuru itu mondo uwinj kaka ayalo bucha.

⁷ Ere gima omiyo uriambo? Koso uparo ni miriambou biro konyo Nyasaye?

⁸ Udwaro dok ni Nyasaye koso? Koso udwaro chwake kiyale?

⁹ To ka Nyasaye orangou maber, bende doyud gimoro maber kuomu? Uparo ni unyalo wuondo Nyasaye kaka uwuondo dhano?

¹⁰ Kata kudokne kamano, to obiro ng’eng’ou malit.

¹¹ Donge tekone biro goyou gi kihondko, mi mbi mare chamu?

¹² Ngecheu kod weche muchwakorugogo onge gi ndhathgi.

¹³ Koro ling’uru mondo uwena thuolo awuo, kata gima nadi ema timore,

¹⁴ nimar aikora mar wito ngimana.

¹⁵ Kata bed ni Nyasaye biro nega, to onge wach! Pod abiro mana wacho wachna e nyime.

¹⁶ Nyalo bet bende ni thwonano biro konya, nimar onge jaricho ma dihedhre dhi e nyim Nyasaye!

¹⁷ Koro chikuru itu maber mondo uwinj weche ma awacho.

¹⁸ Aikora mar yalo, nikech ang’eyo ni achung’ e adiera.

¹⁹ Nyasaye, yie ibi idonjna. Ka iyie timo kamano, to abiro ling’ thi, kendo aikora ni tho.

²⁰ An gi gik moko ariyo kende ma adwaro kwayi, ka itimonagi to ok naringi aa e wang’i.

²¹ Mokwongo, yie iwe sanda. Mar ariyo, yie igol kuoma oko masicheni mabwoga.

²² Nyasaye in ema ikwong wuoyo, eka adwoki. Ka ok kamano, to we awuo, eka idwoka.

²³ Nyisa ketho ma asetimo midonjonago.

²⁴ Ere gima omiyo idhina gi bathi, koso ere gima omiyo ikwana ka jasigu?

²⁵ Ere gima omiyo itemo bwoga, to an mana oboke ma yamo kwadho, kendo mana tiang’ motwo?

²⁶ Idonjona gi weche malit, moriwo koda ka richo mane atimo ka an nyathi.

²⁷ Idhogo tiendena gi nyororo, kendo iketo alama ei tienda mondo onyis kamoro amora ma anyono.

²⁸ An ema iranga, to aorora mana ka yien motop, kata ka law ma olwenda ochamo.