Ayub 12 - MUMA MALER 2015

Ayub onyiso teko gi rieko mar Nyasaye

¹ Ayub nodwoko niya,

² “Adier, un e jodongo ma ok riw gi kiawa, kendo ka utho, to rieko bende olal.

³ To an gi rieko mana ka ma un-go, kendo ok uloya. Ere ng’ama ok ong’eyo gik moko duto musewacho?

⁴ Koda ka osiepena nyiera anyiera, kata obedo ni an ng’at makare kendo ma onge ketho, to chon an ema ne Nyasaye dwoko lemona.

⁵ Yot ni joma onge gi thagruok chayo joma thagore, kendo goyo ng’at ma chiegni podho.

⁶ To jokuo gi joma ok dew Nyasaye odak gi kue, kata obedo ni tekregi giwegi ema giloko Nyasachgi.

⁷ Dhiuru upenj dhok gi winy mondo opuonju,

⁸ kendo ukwa rieko kuom rech manie nam kod gik mamol.

⁹ Giduto ging’eyo ni Nyasaye ema timo gik ma kamago.

¹⁰ Nyasaye ema rito ngima gik mochueyo, kendo much ji duto ni e lwete.

¹¹ Donge it dhano pimo weche mowinjo, mana kaka lep pogo ndhath gik mobilo?

¹² Adier, jodongo nigi rieko, to Nyasaye nigi rieko kod teko.

¹³ Jodongo nigi paro matut, Nyasaye to nigi paro matut, kaachiel gi teko monyalo timogo gimoro amora.

¹⁴ Ka Nyasaye ema omuko gimoro, to ere ng’ama nyalo gere kendo? Koso ka Nyasaye ema oketo ng’ato e tuech, koro ere ng’ama digonye?

¹⁵ Ka Nyasaye ogeng’o koth, to oro wuok, kendo ka oyawo polo, to ohula mwomo, mi keth piny.

¹⁶ Nyasaye nigi teko kod loch, kendo jawuond kaachiel gi ng’at miwuondo duto nie lwete.

¹⁷ Oketho rieko mag jotelo, kendo omayo jong’ad bura paro.

¹⁸ Oriembo ruodhi, kendo oketogi e tuech.

¹⁹ En ema omiyo jodolo bedo jochan ma onge lewni, kendo omiyo joma nigi loch bedo mobolore.

²⁰ Omiyo joma ogen ling’ thi, kendo omiyo rieko mag jodongo lal nono.

²¹ Okuodo wi joma nigi loch, kendo otieko teko jotelo.

²² Ooro ler kuonde motimo mudho mandiwa, kendo olero tiend midhierni matut.

²³ Omiyo ogendini bedo marateke kendo madongo, to bang’e oloyogi, mi okethgi.

²⁴ Omiyo jotendgi bedo mofuwo, kendo oweyo gibayo abaya, mi girweny nono,

²⁵ ka gimulo e mudho mandiwa, kendo ka gitagore ka joma omer.