Ayub 11 - MUMA MALER 2015

Zofar owacho ni Ayub en jaricho

¹ Eka Zofar ja-Nama nowacho ni Ayub niya,

² “Bende ng’ato diwe weche manonogi, mak odwoko? Koso thoro weche mang’eny dimi ng’ato bed ng’ama kare?

³ In Ayub, iparo ni wecheni mang’enygo nyalo miyo ng’ato ling’? Kata kiwacho weche mag ajara, to ok dikweri koso?

⁴ Iparo ni gik miwacho gin adier, bende iwacho ni iler e nyim Nyasaye.

⁵ To ka da bed ni Nyasaye nyalo dwoki kuom wachno,

⁶ to da onyisi ni nitie yore mang’eny mag rieko, kendo nitie gik matut motamo dhano ng’eyo. Neye ni Nyasaye ok dew richoni moko!

⁷ Bende inyalo fwenyo midhierni mag Nyasaye adier? Koso inyalo ng’eyo kama duong’ne ogikie?

⁸ Obor moyombo polo! Koro ere gima ditim? Riekone tut mokadho piny! In to ing’eyo ang’o?

⁹ Duong’ mar Nyasaye lach moloyo piny ngima, kendo lach moloyo nam.

¹⁰ Kapo ni Nyasaye omaki kendo yali, to ere ng’ama ditame?

¹¹ Ong’eyo joma nono, kendo oneno timbegi duto maricho.

¹² Ka kenje thim inyalo nywolo ka muol, to kara joma ofuwo bende nyalo timo timbe mariek!

¹³ Ayub, lok chunyi, mondo idwar Nyasaye.

¹⁴ Gol richo kuomi, kendo riemb timbe ma ok ni kare oa dalani.

¹⁵ Eka diting’ wiyi kionge gi wichkuot, kendo ichak ngima manyien ka in gi chir.

¹⁶ Bang’e wiyi nowil gi chandruokni duto, mana ka koth mochue ochok ma wich wilgo.

¹⁷ Ngimani nobed maler moloyo odiechieng’ tir gi ler, kendo mudho manie ngimani norieny mana ka ler mar okinyi.

¹⁸ Inidag gi kue nikech geno ma in go, kendo Nyasaye noriti, mi miyi yueyo.

¹⁹ Ok inibed ka iluoro wasiki, kendo ji mang’eny nobi mondo ikonygi.

²⁰ To joma timbegi richo norang koni gi koni, ka luoro omako, nikech onge yo moro ma ginyalo tonygo, to tho kende ema ginigen ni biro tiekogi.”