Ayub 10 - MUMA MALER 2015

Ayub omedo ywagore

¹ Aol gi bedo mangima, omiyo koro abiro hulo chandruokna duto, nikech chunya lit.

² A Nyasaye, kik ikwana ka jaketho, to nyisa gima aseketho.

³ Bende en gima ber kibedo makwiny, kendo kijaro gima in iwuon ema ichueyo? To eka ibuonjo kineno rieko ma joma richo ng’ado!

⁴ Bende inyalo neno gik moko kaka dhano neno?

⁵ Koso in ndaloni nok ka ndalo dhano,

⁶ momiyo inono richona, kendo imanyo ketho moro amora ma an-go?

⁷ To chutho ing’eyo ni aonge gi ketho, kendo aonge gi ng’ato ma diresa kuomi.

⁸ Donge lweti mane ochweya ema koro tieka?

⁹ A Nyasaye, par ni ne ichweya kuom lowo, to bende didwoka e lowo adier?

¹⁰ Ne imiyo wuora teko mondo onywola, mi imiyo adongo ei mama.

¹¹ Ne ichweyo ringra gi choke kod leche, mi iumo chokena gi ring’o kod pien.

¹² Isemiya ngima, kendo isehera gi hera mosiko, bende pod abedo mangima, nikech in ema irita.

¹³ To kata obedo kamano, koro ang’eyo ni e chunyi kucha,

¹⁴ ne irito mondo ine ane ka atimo richo, mana ni mondo itamri weyona richonano!

¹⁵ Ka aketho, to alewo. To kata ka atimo maber, to ok ayud pak. Yaye, chunya lit, kendo wichkuot ohewa!

¹⁶ Ka adhi maber, to idwara mana ka sibuor, kendo itimo honni mondo ihinyago.

¹⁷ Pile ibedo gi joneno maranga, momiyo mirimbi medore ameda kuoma, kendo pile ikelona chandruok manyien.

¹⁸ A Nyasaye, ne imiyo onywola nang’o?

¹⁹ Dine ber ka atho ka pok ng’ato onena. Ka dine awuog ei mama, mi yika mana gi kanyono, to mano dine obedo maber, mana ka gima ne ok onywola.

²⁰ Donge ngimana chiegni rumo? Koro weya mondo acham ngima e ndalo modong’na,

²¹ ka pok adhi e piny motimo mudho mandiwa, kuma ok anyal wuokie.

²² En piny motimo mudho kod tipo, ma kata ler en mana mudho.”