Ayub 1 - MUMA MALER 2015

Satan otemo Ayub

¹ Ne nitie ng’at moro ma nyinge Ayub, mane odak e piny Uz. Ne en ng’at makare kendo maler, mane oluoro Nyasaye, kendo otang’ ni richo.

² Nonywolo yawuowi abiriyo gi nyiri adek,

³ kendo ne en gi rombe alufu abiriyo gi ngamia alufu adek gi dhok alufu achiel kod kenje mia abich. To bende ne en gi jotich mogundho. Kamano ne en ng’at momewie moloyo ji duto ma nodak e pinje man yo wuok chieng’.

⁴ Yawuote ne timo sawo, moro ka moro e ode, kendo luongoe owetene mamoko duto. Bende ne giluongoe nyiminegi adekgo mondo okonygi chiemo.

⁵ Kane sawo ka sawo oserumo, Ayub ne chiew gokinyi mang’ich, kendo timo misango mondo opwodhgo nyithinde. Ne otimo kamano pile, koparo ni dipo ka achiel kuomgi oketho kuom yanyo Nyasaye gi chunye.

⁶ To kinde nochopo ma yawuot polo obiro e nyim Ruoth Nyasaye, kendo Satan bende ne ni kodgi.

⁷ Ruoth Nyasaye nopenje ni, “Ia kanye?” Satan nodwoke niya, “Asebedo ka abayo abaya e piny, kalworora koni gi koni.”

⁸ Eka Ruoth Nyasaye nochako openje ni, “Bende inenoe Ayub jatichna? Onge ng’at makare kendo maler ka en e piny ngima, moluora kendo otang’ gi richo.”

⁹ Satan nodwoko ni, “Bende Ayub diluori adier, ka ok oyud gimoro kuomi?

¹⁰ Donge irite maber, kaachiel gi joode kod gimoro amora ma en go? Iguedho gik moko duto motimo, kendo isemiye dhok mopong’o piny.

¹¹ To koro sani temie kawo gik moko ma en go ka ane ka dang’ ok okuong’i e wang’i!”

¹² Ruoth Nyasaye nowacho ni Satan niya, “Kara ber, aketo gik moko duto ma en go e tekoni, mak mana ni en owuon to kik ihinye.” Bang’ mano Satan noa odhi.

¹³ Chieng’ moro kane oyudo nyithind Ayub timo sawo e dala owadgi maduong’,

¹⁴ ng’at moro nobiro ir Ayub ka ringo, mowachone niya, “Nende oyudo wapuro gi dhok, ka kenje bende kwayo machiegni e lek.

¹⁵ Eka wapo ka jo-Sabea omonjowa moyako jamnigo duto. Nende ginego jotichni duto pep, mak mana an kenda ema atony, omiyo abiro mondo anyisi.”

¹⁶ To kane pok otieko wuoyo, jatich machielo nobiro mowacho niya, “Polo nende ogoyo rombe gi jokwath, motho pep, mak mana an kenda ema atony, omiyo abiro mondo anyisi.”

¹⁷ Kane pok otieko wuoyo, jatich machielo notucho, mowacho niya, “Mony adek mag jo-Kaldai nende omonjowa, mokawo ngamia mawa, kendo onego jotichni duto, mak mana an kenda ema atony, omiyo abiro mondo anyisi.”

¹⁸ To kane pok otieko wuoyo, jatich mar ang’wen nobiro, mowacho niya, “Nyithindi nende timo sawo e dala wuodi maduong’

¹⁹ mi kalausi moa e thim ogoyo ot piny, monego nyithindi duto pep. An kenda ema atony, omiyo abiro mondo anyisi.”

²⁰ Bang’e Ayub nochung’, moyiecho lepe kanyisogo kuyo ma en go. Ne olielo wiye apwodha mopodho piny auma.

²¹ Eka nowacho niya, “Kane awuok ei mama, to ne aonge gi gimoro, kendo chieng’ ma atho, to ok nadog gi gimoro. Ruoth Nyasaye ema ne ochiwo, kendo en ema koro osekawo. Nying Ruoth Nyasaye opaki!”

²² Kuom mano, kata obedo Ayub osesandore malit kamano, to ne ok oketho, kata wacho ni Nyasaye rach, ne ok owacho.