Amos 7 - MUMA MALER 2015

Fweny adek

¹ Ruoth Nyasaye nokona e fweny, mi anenoe rumbi mar bonyo monywol e ndalo ma cham chiegni chiekie.

² E fwenyno naneno ka bonyogo osetieko chamo gimoro amora mang’ich e piny. Eka ne awacho niya, “A Ruoth Nyasaye, ng’wonni jogi, ma joka Jakobo. Ere kaka ginyalo resore, to ginok kamano?”

³ Mi chuny Ruoth Nyasaye nolendo, mowacho niya, “Ee, ayie. Gima kamano ok notimre.”

⁴ Ruoth Nyasaye nochako okelona fweny machielo, mi aneno ka ooro mach mondo owang’ nam maduong’ manie bwo piny, kendo mondo otiek gik moko duto manie piny.

⁵ Eka naywak niya, “A Ruoth Nyasaye, akwayi ni we timo kamano. Ere kaka jo-Israel nyalo resore, to ginok kamano?”

⁶ Mi chuny Ruoth Nyasaye nochako olendo, mowacho niya, “Mano bende ok bi timore.”

⁷ Ruoth Nyasaye nokelona fweny moro machielo mi anenoe ng’ato mochung’ e kor ot, koting’o tol mar rapim mipimogo kor ot mondo one ane koriere tir.

⁸ Eka Ruoth Nyasaye nopenja niya, “Amos, ang’o minenono?” Ne adwoke niya, “Aneno tol mar rapim.” Ruoth Nyasaye nowacho niya, “Apimo chuny joga Israel gi rapim, mana kaka ng’ama pimo kor ot, kendo ok nachak awenigi ngang’.

⁹ Kuonde ma joka Isaka lemoe ibiro kethi, kendo kuonde maler duto mag Israel biro kethore, bende abiro biro mondo aked gi dhood Jeroboam.”

Amos gi Amazia

¹⁰ Amazia jadolo man Bethel nonyiso Jeroboam ruodh Israel niya, “Amos piem kodi e Israel, kendo wechene biro ketho piny.

¹¹ Owacho niya, ‘Jeroboam biro tho e lweny, kendo jo-Israel ibiro daro e pinygi, mi tere e tuech.’ ”

¹² Amos owuon, to ne Amazia okwero niya, “Dhi kucha, jakorni! Dhiyo e piny Juda mondo ikor wach kuno iyudgo chiembi.

¹³ To kik ichak ikor wach Bethel ka, nikech ma en Hekalu mar pinywa, kama ruoth lemoe.”

¹⁴ To Amos nodwoko Amazia niya, “An ok an janabi, to bende mano ok tija. An mana jakwath, kendo jarit yiend ng’owo.

¹⁵ To Ruoth Nyasaye ema nokawa ka akwayo rombe, mi owachona niya, ‘Dhiyo mondo ikor wach ni joga Israel’

¹⁶ Kuom mano koro winj wach Ruoth Nyasaye. Ikwera ni awe koro wach kuom jo-Israel, kendo ni awe wacho weche manono kuom joka Isaka.

¹⁷ To Ruoth Nyasaye wachoni kama: ‘Chiegi biro doko jachode e dala Samaria, kendo yawuoti gi nyigi noneg e lweny. Lopi nopog gipimo gi rapim, to in iwuon initho e piny moro nono, kendo jo-Israel nodar, mi ter e tuech.’ ”