Amos 6 - MUMA MALER 2015

Oketh Israel

¹ “Mano biro bedo wach marach manade kuom joma odak maber Sayun, kendo kuom joma ogeno ni gode mag Samaria nyalo resogi. Un joma dongo mag oganda maduong’ moloyo, ma joma jo-Israel dhi irgi mondo oyud konyruok,

² dhiuru uneye Kalne mi uchwe nyaka Hamath, eka ulor udhi Gath e piny jo-Filistia. Uparo ni uber moloyo jo-pinjego? Koso pinyu duong’ moloyo pinjegi?

³ Un joma ok odewo ni chieng’ bura biro, to urikni mana kutimo timbe mahundu!

⁴ Un ma unindo e kitendni molos gi lak liech, kendo utaroru e kombe madongo, kuchamo nyirombe mugolo kuom jambu, kod nyiruedhi machue mopidh maber.

⁵ Un muchuogo wende manono, kugoyo thum kendo uloso thumbe kaka ne Daudi loso,

⁶ umodho divai gi ndope, kendo uwiroru gi modhi ma nengogi tek, to ok litnu ka joka Josef rumo.

⁷ Kuom mano, ubiro bedo joma ikwongo daro, kitero e tuech. Mano biro bedo giko mar mor mudhialorugono.”

⁸ Ruoth Nyasaye Manyalo Gik Moko Duto osesingore owuon niya, “Asin gi sunga mar joka Jakobo, kendo asin gi utgi madongo dongo. Abiro chiwo Samaria ma dalagi, kod gik moko duto man e iye e lwet wasigu.

⁹ Ka ji apar odong’ e ot achiel, to ginitho giduto,

¹⁰ kendo ka wat ng’at achiel kuom joma othogo obiro mondo ogol ringre wadgi, owang’, nopenj niya, ‘Pod nitie ng’ato modong’ koso?’ To dwoko nobed ni, ‘Ongee. To ling’ nimar nying Ruoth Nyasaye ok nyal hul.’ ”

¹¹ Ruoth Nyasaye biro golo chik, mi udi madongo nomuki, mi lokre pidhe, to matindo noteng’ matindo tindo.

¹² Farese bende nyalo ringo e kite? Koso dhok nyalo puro nam? To un uloko bura makare mana gima kech, kendo tim maber uloko mana gima rach.

¹³ Umor kuom loyo dala maonge ndhathe, bende usungoru ni un gi teko moloyo kawo Karnaim.

¹⁴ “To un jo-Israel, abiro kelo oganda moro mondo omonju, kendo ginisandu, chakre kama idonjogo Hamath, man yo nyandwat, nyaka holo man yo Araba, yo milambo. An Ruoth Nyasaye Manyalo Gik Moko Duto ema awacho kamano.”