Amos 5 - MUMA MALER 2015

Oluong jo-Israel mondo olokre

¹ Chikuru itu un jo-Israel mondo uwinj wend ywak ma achuogonu.

² “Oganda Israel osepodho, to ok nochak oa malo. Opodho piny auma e lope owuon, kendo onge ng’ama ochunge.”

³ Ruoth Nyasaye owacho niya, “Dala Israel mane jolweny owuokie alufu achiel, biro duogoe mana ji mia kende. To mano mane owuokie ji mia achiel, biro duogo mana ji apar.”

⁴ Ruoth Nyasaye wacho ni jo-Israel niya,

⁵ “Kudwaro bedo mangima, to duoguru ira. To kik udhi Bethel, kata kik udhi Gilgal, bende kik ukadh nyaka Beer-sheba, nimar jo-Gilgal ibiro daro mi ter e tuech, kendo Bethel biro lal nono.”

⁶ Ka udwaro bet mangima, to dwaruru Ruoth Nyasaye, nono to obiro muoch kuom joka Josef ka mach. En mach mabiro wang’o jo-Israel maonge ng’ama nego.

⁸ Ruoth Nyasaye ema nochueyo Yugni gi Ratego, kendo en ema omiyo piny ru kendo yuso. Oluongo pi nam mondo obi, kendo oologi e piny.

⁹ En ema omiyo sulue wuok kendo podho, kaluwore, chakre Oluoro Budho nyaka Ratego.

⁷ Mano wach manade kuom un ma loko bura makare ataro, kendo tuono ji gik monego giyudi!

¹⁰ Un to umon gi ng’ama odonjo ni jaketho, kendo uchayo ng’at mawacho adiera.

¹¹ Usethiro joma odhier, kendo usekawo chambgi moko kaka osuru. Kuom mano ok unudag e udi mabeyo mag kite musegero, bende ok unumadh divai kuom mzabibu mabeyo musepidho,

¹² nimar ang’eyo kaka kethou ng’eny, kendo ang’eyo kaka richou okadho akwana. Un usando joma onge gi ketho, kendo uchamo asoya, bende utamo joma odhier yudo bura makare.

¹³ Emomiyo ng’at mariek ling’ aling’a, nikech piny rach.

¹⁴ Dwaruru ber, to kik udwar rach, mondo ubed mangima, kendo Ruoth Nyasaye Manyalo Gik Moko Duto obed jakoru adier kaka uparono.

¹⁵ Beduru mamon gi gik maricho, to heruru gik mabeyo, kendo gururu bura makare e ut bura, nikech dipo ka Ruoth Nyasaye Manyalo Gik Moko Duto otimo ng’wono ni joka Josef modong’.

¹⁶ Kuom mano, Ruoth Nyasaye Manyalo Gik Moko Duto wacho kama: “Ywak biro bet e yore duto mag dala, kendo kuonde duto ji nobed kaywakie, ma kata mana jopur noluong mondo oywagi kaachiel gi joma ong’eyo wende ywak.

¹⁷ Ywak nobed e puothe duto mag mzabibu, nimar anabi mondo akumu.

¹⁸ Un joma ofuwo ma dwaro mondo chieng’ Ruoth Nyasaye obi, uparo ni chieng’no nokelnu ang’o? Ok nobed chieng’ ler, to nobed mana chieng’ mudho!

¹⁹ Unuchal mana gi ng’at ma sibuor riembo, to romo gi ondiek, kata machal gi ng’at modonjo e ot, kendo oyiengo lwete e kor ot, mi thuol okayo!

²⁰ Chieng’ Ruoth Nyasaye en mana mudho mandiwa. Adier, en chieng’ molil, maonge ler!

²¹ “Amon gi sewni mutimona, kendo ajarogi, bende ok ahero nyasi mau mag lemo.

²² Ka utimona misengni miwang’o pep, kod misengni mag cham, to ok nayiego, bende ok narang jambu mutimogo misengni mag sawo.

²³ Weuru baro wiya gi wendeu mag pak, nikech ok adwar winjo thumbe mugoyona.

²⁴ Weuru bura makare omol ka pi, kendo tim makare bende omol ka aora ma ok duon.

²⁵ “Apenjou, un jo-Israel, bende nutimona misengni, kendo ukelona chiwo kuom higni piero ang’wen mane utieko e thimgo duto?

²⁶ Koro nyaka uting’ nyisecheu manono mag sulue ma Sakuth gi Kaiwan mane uloso,

²⁷ kendo abiro darou mi ateru e tuech, e piny man loka machielo mar Damaski.” Ruoth Nyasaye Manyalo Gik Moko Duto owacho kamano.