Amos 1 - MUMA MALER 2015

Bura mibiro ng’ado ni ogendini ma okiewo gi jo-Israel

¹ Magi e weche Amos, mane achiel kuom jokwath ma nodak Tekoa. Nyasaye nofwenyone wechegi higni ariyo ka pok yiengni piny obetie, ka Uzia e ruodh Juda, to Jeroboam wuod Joash e ruodh Israel.

² Nowacho niya, “Ruoth Nyasaye ruto Sayun! Ee, dwonde mor Jerusalem! Kuom mano lege jamni two, kendo wi got Karmel mang’ich ner.”

³ Ruoth Nyasaye nowacho niya, “Jo-Damaski osetimo richo mang’eny, omiyo abiro kumogi mak orem, nikech gisesando jo-Gilead gi sand malit, ka giywayo kuomgi bepe mogurie musmande mabitho midinogo cham.

⁴ Kuom mano abiro oro mach e dhood Hazael piny Aram, kendo majno biro wang’o miech ruodh Ben-hadad mochiel motegno.

⁵ Abiro turo lodi mag dhoranga Damaski, mi ariemb jodong holo Aven kod Beth-eden. Jo-Aram ibi dar mi ter mabor e tuech e piny Kir.”

⁶ Ruoth Nyasaye owacho niya, “Jo-Gaza osetimo richo mang’eny, omiyo abiro kumogi mak orem, nikech ne gikawo oganda ngima, mi giketo e lwet jo-Edom.

⁷ Kuom mano abiro oro mach e ohinga mar Gaza mondo owang’ kuonde mochiel motegno mag dalano,

⁸ kendo abiro riembo jodong mier mag Ashdod gi Ashkelon. Anakum dala mar Ekron, kendo jo-Filistia duto modong’ notho.” Mano e wach Ruoth Nyasaye.

⁹ Ruoth Nyasaye owacho niya, “Jo-Turo osetimo richo mang’eny, omiyo abiro kumogi mak orem, nikech ne gidaro oganda moro, mi gitero e piny Edom e tuech, ka ok girito winjruok mar osiep mane gitimo kodgi.

¹⁰ Kuom mano abiro oro mach e ohinga mar Turo mondo owang’ kuonde mochiel motegno mag dalano.”

¹¹ Ruoth Nyasaye owacho niya, “Jo-Edom osetimo richo mang’eny, omiyo abiro kumogi mak orem, nikech ne gimonjo jowetegi ma jo-Israel, mi ginego malit, kendo ne ok gigeng’o mirimbgi, to ne gisiko ka gimako kodgi sadha marach.

¹² Kuom mano abiro oro mach Teman mondo owang’ kuonde mochiel motegno mag Bozra.”

¹³ Ruoth Nyasaye owacho niya, “Jo-Amon osetimo richo mang’eny, omiyo abiro kumogi mak orem, nikech wuoch lowo nomakogi, mi giriedo iye mon mayach e piny Gilead.

¹⁴ Kuom mano abiro moko mach e ohinga mar Raba mondo owang’ kuonde mochiel motegno mag dalano. Ji nogo mahu chieng’ kedo, kendo lweny nobed maliet ka mach.

¹⁵ Ruodhgi ibiro daro, mi ter e tuech, kaachiel gi jodonge.”