2 Samuel 9 - MUMA MALER 2015

Daudi otimo maber ni Mefibosheth

¹ Daudi nopenjo niya, “Dipo kodong’ie ng’at moro ma ja dhood Saulo koso, mondo atimne maber, nikech hera mane aherogo Jonathan?”

² Ne nitie jatich joka Saulo moro ma nyinge Ziba. Ne giluonge mondo obi ir Daudi. Kane osebiro, ruoth nopenje niya, “In e Ziba koso?” Mi nodwoke niya, “E an, ruoth.”

³ Ruoth nomedo penje ni, “Dipo kodong’ie ng’at moro ma ja dhood Saulo, mondo atimne maber, kaka Nyasaye dwaro?” Ziba nodwoko ruoth niya, “Wuod Jonathan moro pod nitie, ma tiendene ong’ol”

⁴ Ruoth nopenje ni, “En kanye?” Ziba nodwoke niya, “En Lodebar, e od Makir wuod Amiel.”

⁵ Omiyo Daudi nooro joote Lodebar, mondo oome.

⁶ Kamano Mefibosheth wuod Jonathan, ma wuod Saulo nobiro ir Daudi, mogoyo chonge piny nyaka e lowo. Daudi noluonge niya, “Mefibosheth.” Mi nodwoke ni, “Antie ruoth.”

⁷ Daudi nowachone niya, “Kik iluor, nimar abiro timoni maber nikech hera ma naherogo Jonathan wuoru. Abiro dwokoni puothe duto mane mag Saulo kwaru, kendo anamiyi chiemo pile.”

⁸ Mefibosheth nochako okulorene, ka wacho niya, “An aana ni, an ng’a, momiyo itimona maber kamano! An machalo guok mothoni?”

⁹ Ruoth noluongo Ziba, jatich Saulo, mowachone niya, “Gik moko duto mane mag Saulo kod joode, koro amiyo Mefibosheth nyakwar ruodhu.

¹⁰ In kod yawuoti gi wasumbi nyaka upurne puothene, kendo ukelne cham monyakie, mondo jood nyakwar ruodhu oyud chiemo. Mefibosheth owuon to abiro miyo chiemo ndalo duto.”

¹¹ Ziba nodwoke niya, “Ruoth, abiro timo gik moko duto michika.” (Noyudo ka Ziba nigi yawuowi apar gabich, kod wasumbini pieri ariyo.) Kamano Mefibosheth nochiemo e mesa Daudi, kaka achiel kuom yawuot ruoth.

¹² Ne en gi wuode matin, ma nyinge Mika. Jogo duto ma nodak e od Ziba nodoko jotich Mefibosheth.

¹³ Mefibosheth nodak Jerusalem, nikech nochiemo ndalo duto e mesa ruoth. To tiende duto nong’ol.