2 Samuel 6 - MUMA MALER 2015

Daudi odhi omo Sanduk mar Nyasaye

¹ Daudi nochako ochoko jolweny moyier duto mag Israel, alufu piero adek.

² Eka nowuok kaachiel kodgi, modhi Baale-juda, mondo oom Sanduk mar Nyasaye, miluongogo nying Ruoth Nyasaye Manyalo Gik Moko Duto, mobet kuom kerubi kaka ruoth bet e kom duong’ne.

³ Ne giketo Sanduk mar Nyasaye e gari manyien, ka gigole e od Abinadab mane nie got. Uza gi Ahio, ma yawuot Abinadab, ema ne chiko gari manyienno,

⁴ moting’o Sanduk mar Nyasaye, ka Ahio otelo e nyim Sanduk.

⁵ Daudi gi dhood jo-Israel te ne jomiel gi tekregi duto e nyim Ruoth Nyasaye ka giwer, kendo gigoyo nyigwerni gi nyidwonge gi ajape kod ongeng’o.

⁶ To kane gichopo kar dino moro, dhok mane ywayo gari nochwanyore, mi Uza norieyo bade mondo ojuk Sanduk mane dwaro podho.

⁷ To Ruoth Nyasaye nokecho kode, mochwade kanyo nikech nomako Sanduk. Mi notho but Sanduk mar Nyasaye.

⁸ Daudi nokecho nikech Ruoth Nyasaye nomwomore kuom Uza, omiyo nochako kanyo ni Perez-uza, (tiende ni Mwomruok kuom Uza.) Pod iluonge kamano nyaka chil kawuono.

⁹ Daudi noluoro Ruoth Nyasaye chieng’no, mowacho niya, “Kara Sanduk mar Ruoth Nyasaye ok onego bed e dalana.”

¹⁰ Omiyo ne ok odwar kelo Sanduk mar Ruoth Nyasaye e dalane, to nobaro kode, motere e od Obed-edom ja-Giti.

¹¹ Sanduk mar Ruoth Nyasaye nobet e od Obed-edom ja-Giti kuom dueche adek, mi Ruoth Nyasaye noguedho Obed-edom gi joode duto.

Daudi otero Sanduk mar Nyasaye Jerusalem

¹² Nonyis ruoth Daudi wach niya, “Ruoth Nyasaye oseguedho od Obed-edom kod gige duto nikech Sanduk mar Nyasaye ni kuno.” Omiyo Daudi nodhi moomo Sanduk mar Nyasaye e od Obed-edom, kendo nokele dalane gi mor.

¹³ Kane joma oting’o Sanduk mar Ruoth Nyasaye osewuotho ondamo auchiel, Daudi notimo misango gi rwath kod im machwe.

¹⁴ Nomiel aduwa e nyim Ruoth Nyasaye gi tekre duto, korwakore gi law dolo.

¹⁵ Kamano Daudi gi dhood jo-Israel duto nokelo Sanduk mar Ruoth Nyasaye gi mahu maduong’ kod tung’ ka ywak.

¹⁶ Kane Sanduk mar Ruoth Nyasaye ochopo e dala Daudi, Mikal nyar Saulo nong’icho gie dirisa, moneno ruoth Daudi ka chikore kendo miel aduwa e nyim Ruoth Nyasaye, mi nochaye gi chunye.

¹⁷ Ne gikelo Sanduk mar Ruoth Nyasaye, mi giketo kare e hema mane Daudi ogurone. Eka Daudi notimo misengni miwang’o pep, kod misengni mag sawo e nyim Ruoth Nyasaye.

¹⁸ Kane osetieko misengnigo, noguedho jo-Israel e nyim Ruoth Nyasaye Manyalo Gik Moko Duto,

¹⁹ kendo nopogonigi chiemo giduto. Ng’ato ka ng’ato ma dichwo kata ma dhako manie oganda Israel, noyudo makati achiel gi ring’o, kod mzabibu motwo mong’in. Eka ji duto nodok miechgi.

²⁰ Daudi bende nodok e ode mondo one joode. To Mikal nyar Saulo nowuok romone, mowachone niya, “Tho! Mano duong’ manadi ma nende ruodh Israel oyudo kawuono, komore duk e nyim nyiri ma tiyo ni jotichne, koelore ka ng’ama ofuwo!”

²¹ Daudi nodwoko Mikal niya, “Nende amiel e nyim Ruoth Nyasaye ma noyiera kar wuoru gi joode duto, koketa ruodh jo-Israel, ma ogadane. Pod abiro miel e nyim Ruoth Nyasaye,

²² ka amedo bedo ng’ama iseyo mokadho ka. Dipo ka in ema ichaya, to nyiri miwachogo biro miya duong’.”

²³ Mikal nyar Saulo ne ok onywolo nyathi nyaka thone.