2 Samuel 3 - MUMA MALER 2015

¹ Lweny nodhi nyime e kind dhood Saulo gi dhood Daudi kuom ndalo momedore. Daudi nomedo locho, to dhood Saulo nomedo dok chien.

Yawuot Daudi mane onywol Hebron

² Yawuot Daudi mane onywolo Hebron e magi: Wuode makayo ne Amon, ma min mare ne Ahinoam, nyar Jezreel;

³ mar ariyo ne Kileab, ma min mare ne Abigail, chi Nabal ja-Karmel; mar adek ne Absalom, ma min mare ne Maaka, nyar Talmai, ruodh Geshur;

⁴ mar ang’wen ne Adonija, ma min mare ne Hagith; mar abich ne Shefetia, ma min mare ne Abital;

⁵ mar auchiel ne Ithream, mane wuod chiege ma nyinge Elga. Jogi duto Daudi nonywolo Hebron.

Abner ochano timo winjruok gi Daudi

⁶ Kane pod lweny dhi nyime e kind dhood Saulo gi dhood Daudi, Abner nomedo yudo duong’ e dhood Saulo.

⁷ Ne nitie chi Saulo moro, ma nyinge Rizpa, nyar Aya, ma nomiyo Ishbosheth openjo Abner niya, “Marang’o isedonjo e doho wuora, mitero chiege?”

⁸ Abner nokecho ahinya nikech wachno, mi nodwoko Ishbosheth niya, “Ikawa ka guo Juda koso? Kinde duto asebedo jaadiera ni dhood Saulo wuoru, gi owetene kod osiepene, ka ok achiwi e lwet Daudi, to koro eka ichwanya kuom wach dhako!

⁹ Nyasaye mondo okweda ka ok atimo ni Daudi kaka Ruoth Nyasaye nosingorene,

¹⁰ ni enogol loch kuom dhood Saulo, kendo noket Daudi obed ruodh jo-Israel gi jo-Juda, chakre Dan nyaka Beer-sheba!”

¹¹ Ishbosheth ne ok nyal dwoko Abner kata wach achiel, nikech noluore.

¹² Abner nooro joote Hebron ir Daudi, kowachone niya, “Tim koda winjruok, mi nakonyi loko jo-Israel duto mondo oduog iri.”

¹³ Daudi nodwoke niya, “Ber! Ayie timo kodi winjruok, to mak mana kikelo Mikal nyar Saulo, chieng’ mibiro nena.”

¹⁴ Bende Daudi nooro joote ir Ishbosheth wuod Saulo, kowacho niya, “Dwokna Mikal ma chiega, ma nanywomo gi ringre jo-Filistia mia achiel.”

¹⁵ Mi Ishbosheth nooro joote, mogolo Mikal kuom chwore ma Paltiel wuod Laish.

¹⁶ Chworeno nokowe nyaka Bahurim, ka ywak. To Abner nowachone ni, “Dogi!” Mi nodok.

¹⁷ Abner nowuoyo gi jodong Israel, kowachonigi niya, “Kuom ndalo mokadho usedwaro mondo Daudi obed ruodhu.

¹⁸ Koro keteuru, nikech Ruoth Nyasaye osesingore kuome, ka wacho niya, ‘Gi lwet Daudi anares joga Israel e lwet jo-Filistia, kendo e lwet wasikgi duto.’ ”

¹⁹ Abner nowuoyo gi jo-Benjamin bende. Eka nodhi Hebron mondo onyis Daudi gik moko duto mane jo-Israel gi jo-Benjamin dwaro timo.

²⁰ Abner nobiro Hebron ir Daudi, kaachiel gi ji piero ariyo mi Daudi norwakogi gi chiemo.

²¹ Bang’e Abner nowacho ni Daudi niya, “Ruoth, koro adok loko jo-Israel duto odogni, mondo gitim kodi singruok, kendo mondo ibed ruodh pinywa duto, kaka chunyi dwaro.” Omiyo Daudi nogoyo ni Abner oriti, modhi gi kue.

Joab ogeno Abner

²² To Joab gi jo-Daudi noyudo duogo mana sano. Ne gia peyo, ka gikelo gik mang’eny mane giyako. To Abner ne koro osea ir Daudi Hebron, nikech Daudi nosemiye thuolo, modhi gi kue.

²³ Kane Joab gi jolweny mane ni kode ochopo Hebron, nonyise niya, “Abner wuod Ner nobiro ir ruoth, mi ruoth oweye odhi gi kue.”

²⁴ Abner nodhi ir ruoth, mopenje niya, “En ang’o misetimo? Awinjo ni Abner nobiro iri. Marang’o imiye thuolo mondo odhi, momiyo koro otony?

²⁵ Donge ing’eyo ni Abner wuod Ner nobiro mana ni mondo owuondi, kendo ong’e wuodheni, kod gik mitimo duto?”

²⁶ Kane Joab osea ir Daudi, nooro joote mondo olaw Abner. Ne gijuke e soko mar Sira, mi giduoge. To Daudi ne kia wachno.

²⁷ Kane Abner oduogo Hebron, Joab nobaro kode but rangach, ka gima odwaro wuoyo kode ling’ling’, mi nochwowo bund iye, monege, kochulo kuor nikech remb Asahel owadgi.

²⁸ Kane Daudi owinjo wachno, nowacho niya, “An, kod joga, waonge bura e nyim Ruoth Nyasaye kuom tho Abner wuod Ner nyaka chieng’.

²⁹ Rembe mondo obed ewi Joab, kendo kuom dhoode duto. E dhood Joab nyaka bedie ng’ama rembe chuer, kata ng’ama jadhoho, kata ng’at modere, kata ng’ama ochando chiemo!”

³⁰ Kamano e kaka Joab gi Abishai owadgi nonego Abner, nikech en ema nonego Asahel owadgi Joab gi Abishai e lweny Gibeon.

³¹ Daudi nowacho ni Joab gi ji duto mane ni kode niya, “Yiechuru lepu, urwakru gi piende gugru, kendo uywag Abner.” Daudi owuon nodhi e liel ka luwo bang’ Abner.

³² Ne giyiko Abner Hebron, kendo ruoth noywak gi mirima e liende, mi ji duto bende noywak kode.

³³ Ruoth noywago Abner, kawacho niya: “Yaye Abner! Bende owinjore itho kaka ng’ama ofuwo adier?

³⁴ Lweti ne ok otue, kata tiendi ne ok omaki gi ratege. To nitho mana kaka ng’ato tho e lwet joma richo!” Bang’e ji duto nomedo ywage.

³⁵ Ne gihoyo Daudi mondo ochiem, to piny ne pod odiechieng’, omiyo Daudi nokuong’ore, kawacho niya, “Nyasaye mondo okweda, kapo ni achiemo, kata abilo gimoro ka pok chieng’ opodho.”

³⁶ Wachno ne long’o ni ji duto ma nowinjo, mana kaka gik moko duto mane ruoth timo ne long’onigi.

³⁷ Kamano ji duto nong’eyo chieng’no ni kara, ruoth ne kiya wach nek Abner wuod Ner.

³⁸ Ruoth nowacho ni joge niya, “Donge ung’eyo ni jalweny maduong’ e Israel ema otho kawuono?.

³⁹ Kata obedo ni an ruoth kamano, to yawuot Zeruyagi otamo wang’a. Ruoth Nyasaye ema mondo ochul kuor ni ng’ama rach moromo gi rach mosetimo.”