2 Samuel 24 - MUMA MALER 2015

Daudi okwano jo-Israel gi jo-Juda

¹ Mirima nochako omako Ruoth Nyasaye kod jo-Israel, mi nomiyo Daudi otimo gimoro ma dihinygi, kowachone niya, “Dhiyo ikwan jo-Israel gi jo-Juda.”

² Omiyo ruoth nowacho ni Joab gi jotend lweny mane ni kode niya, “Dhiuru koro, uwuoth e dhout Israel duto, chakre Dan nyaka Beer-sheba, kukwano ji, mondo ung’e kar rombgi.”

³ To Joab nodwoko ruoth niya, “Ruoth Nyasaye ma Nyasachi mondo omedni ji nyadi mia achiel kapod wang’i neno. To marang’o iketo chunyi e wachni?”

⁴ Kata kamano ruoth nochuno Joab gi jotend lweny, mi ne giwuok mondo gikwan jo-Israel.

⁵ Ne ging’ado aora Jordan, mi gichako kweno Aroer kod dala manie holono, ka gichiko Gad nyaka Jazer.

⁶ Eka ne gidhi Dan, mi kane giwuok kuro, ne giluwo piny nyaka Sidon,

⁷ gi dala Turo mochiel gi ohinga kod mier duto mag jo-Hivi gi mag jo-Kanaan. Achien ne gidhi nyaka Beer-sheba, yo thim Juda.

⁸ Bang’ dueche ochiko gi ndalo piero ariyo, kane gisewuotho e pinygi duto, ne giduogo Jerusalem.

⁹ Joab nonyiso ruoth kar romb ji kama: E piny Israel ne nitie ji alufu mia aboro ma nyalo kedo, to jo-Juda ne gin alufu mia abich.

¹⁰ To kane Daudi osekwano ji, chunye nochande, mowacho ni Ruoth Nyasaye niya, “A Ruoth Nyasaye, aseketho ahinya kuom gima asetimo. To koro asayi ni mondo iwena richona, nikech asetimo gima ofuwo.”

¹¹ Eka kane Daudi ochiew gokinyi, noyudo ka Ruoth Nyasaye osenyiso Gad janabi, mane jakor wach ni Daudi, kowachone niya,

¹² “Dhiyo inyis Daudi ni Ruoth Nyasaye osewacho kama: ‘Aketo gik moko adek e nyimi. Yier achiel kuomgi monego atimni.’ ”

¹³ Omiyo Gad nodhi ir Daudi mopenje niya, “Ere gima iyiero? Idwaro mondo kech omak pinyu kuom higni adek? Koso idwaro ringo wasiki kuom dueche adek ka gilawi? Koso tho malit mondo obed e pinyu kuom ndalo adek? Parane, inyisa gima dadwok jal moora.”

¹⁴ Daudi nodwoko Gad niya, “An gi masira maduong’, to ber mondo wabed e lwet Ruoth Nyasaye, nimar ng’wonone duong’. To kik abed e lwet dhano.”

¹⁵ Omiyo Ruoth Nyasaye nooro tho malit kuom jo-Israel, chakre okinyi, nyaka chop kinde ma noketo. Ji alufu piero abiriyo notho, chakre Dan nyaka Beer-sheba.

¹⁶ To kane malaika orieyo bade kochiko Jerusalem mondo oketh dalano, Ruoth Nyasaye noloko parone kuom masira ma nodwaro timo mowacho ni malaika mane nego ji niya, “Oromo! Koro dwok lweti.” To noyudo ka malaika mar Ruoth Nyasaye obet but kar dino mar Arauna ja-Jebus.

¹⁷ Kane Daudi oneno malaika mane nego ji, nowacho ni Ruoth Nyasaye niya, “An e jakwath moseketho, kendo an ema asetimo gima rach. To ere rach ma ogandani osetimo? Akwayi ni an ema mondo ikuma kod dhoodwa.”

¹⁸ Chieng’no Gad nodhi ir Daudi, mowachone ni, “Dhiyo kar dino mar Arauna ja-Jebus, igerie ni Ruoth Nyasaye kendo-mar-misango.”

¹⁹ Omiyo kane Daudi owinjo wachno, nodhi kaka Ruoth Nyasaye nochike.

²⁰ To kane Arauna oneno ruoth gi joge ka biro ire, nowuok modhi romone, kendo nogoyo chonge piny, mokulorene nyaka e lowo.

²¹ Arauna nopenjo ruoth niya, “Marang’o ibiro ira?” Daudi nodwoke ni, “Adwaro ng’iewo kodi kar dinoni, mondo agerie ni Ruoth Nyasaye kendo-mar-misango, mondo tho ma nego joga orum.”

²² Arauna nowacho ni Daudi niya, “Ruoth, kaw akawa gimoro amora ma chunyi dwaro, ichiw ni Nyasaye. Ruedhi nitie minyalo timogo misango, kendo yien mag dino cham, kendo jok motue e ng’ut dhok, minyalo chwako.

²³ Ruoth, magi duto amiyi.” Eka Arauna nomedo wacho ni ruoth niya, “Ruoth Nyasaye ma Nyasachi mondo oyie gi chiwoni.”

²⁴ To ruoth nodwoke ni, “Ooyo, nyaka achuli, nikech ok natim ni Ruoth Nyasaye ma Nyasacha misengni gi gik mayudo nono.” Omiyo Daudi nochulo fedha ma dirom nus kilo, kong’iewogo kar dino kaachiel gi ruedhigo.

²⁵ Eka nogero ni Ruoth Nyasaye kendo-mar-misango kanyono, motimoe misengni miwang’o pep, kod mag sawo. Ruoth Nyasaye nowinjo lemo ma nochiwne, kendo nogeng’o tho malitno mondo kik oneg jo-Israel.