2 Samuel 22 - MUMA MALER 2015

Wend Daudi mane opakogo Nyasaye kuom rese

¹ Kane Daudi oneno ni Ruoth Nyasaye oserese e lwet Saulo kendo e lwet wasike duto, nopake gi wer kama:

² “A Ruoth Nyasaye, in e lwandana, kendo ohingana.

³ Nyasacha, in e jaresna, gi lwandana ma ageng’orae. In e okumbana, gi teko mar resruokna. In e ohingana gi kar geng’ruokna, kendo jawarna in ema iresa kuom masiche mager.

⁴ Akwayo Ruoth Nyasaye mowinjore oyud pak, kendo ma resa kuom wasika.

⁵ Tho notaga ka apaka kodwaro tera kaka ohula.

⁶ Tonde mag liel nodhoga. Tho ne dwaro maka kobadho.

⁷ Kane anie chandruok, nakwayo Ruoth Nyasaye. Ee, naywak ni Nyasacha. Nowinjo dwonda gie hekalu mare, kendo ywakna nochopo e ite.

⁸ Piny notetni, kendo oyiengni. Mise mag polo bende notetni kendo okirni, nikech mirimb Ruoth Nyasaye

⁹ Iro nodum ka wuok e ume, kendo mach mang’angni bende nowuok e dhoge.

¹⁰ Nosudo polo machiegni, eka nolor, konyono rumbi molil ti.

¹¹ Ne oidho kerubi, mi ohuyogo ka kalausi.

¹² Nokawo mudho kod boche polo morweyo gi koth maduong’, moloko ka hembe.

¹³ Ler motelo e nyime nomoko mach motimo ligega.

¹⁴ Dwond Ruoth Nyasaye nomor. Ee, Ng’ama Duong’ Moloyo nomor gie polo.

¹⁵ Nodiro mil polo ka aserni, kokworogi koni gi koni.

¹⁶ Kane Ruoth Nyasaye okudho ka yamb nyakoi, kendo okwerogi, mise mag piny noelore kendo kude mag nam nofwenyore.

¹⁷ Norieyo bade ka en malo, mi omaka, kogola e ataro-ngala.

¹⁸ Ne oresa e lwet wasika marateke kendo kuom ji duto mosin koda, mane oloya gi teko.

¹⁹ Ne gimonja ka anie masira, to Ruoth Nyasaye ema nokonya.

²⁰ Ne ogola e chandruok, mi abedo thuolo. Noresa nikech nomor koda.

²¹ Ruoth Nyasaye ne opoga pok mowinjore gi timna makare. Nochula moromo gi tichna maler,

²² nikech naluwo yorene kendo ok asepogora kod Nyasacha, kadonjo e richo.

²³ Aserito chikene duto, ma onge kata achiel ma apogorago.

²⁴ Aonge gi ketho e nyim Ruoth Nyasaye kendo aseritora kuom richo.

²⁵ Omiyo osemiya pok mowinjore gi timna makare, kendo moromo gi timna malong’o e nyime.

²⁶ In Ruoth Nyasaye, in jaadiera ni ji mohero adiera, kendo ilong’o ni joma long’o.

²⁷ Iler ni joma ler, to wiyi tek ni joma wigi tek.

²⁸ Ireso joma muol, to josunga idwoko piny.

²⁹ A Ruoth Nyasaye, in e tacha. In e Nyasacha ma menyona mudho.

³⁰ Imiyo aloyo oganda lweny momonja, kendo in e Nyasacha ma konya kalo ohinga.

³¹ Yor Nyasaye en yo malong’o. Osenon wach Ruoth Nyasaye, moyud ni en adier. Ruoth Nyasaye e okumba mar joma ogeno kuome.

³² Ere Nyasaye moro, mak mana Ruoth Nyasachwa? Koso ere lwanda moro, mak mana Nyasachwani?

³³ Nyasayeni e kar pondona motegno. Osemiyo yorena bedo thuolo kendo moboch.

³⁴ En ema omiyo tienda bedo mayot ka tiend mwanda, kendo oresa, koketa malo kama oting’ore.

³⁵ Ojiwo bada ni lweny, mi onyalo ywayo kata mana atung’ mar mula.

³⁶ In Ruoth Nyasaye, isekelona resruok mobedona okumba, kendo konyni ema nomiyo abedo gi duong’.

³⁷ Ne imiya yo malach mondo awuothie mi ne ok akier.

³⁸ Nalawo wasika, mi atiekogi, kendo ne ok aduogo dala ka pok girumo.

³⁹ Nagoyogi ngoga, mi atiekogi! Ne giriere piny e tienda, ma ok ginyal chung’.

⁴⁰ Nimiya teko mar kedo, kendo mar loyo wasika.

⁴¹ Ne imiyo wasika oringa mi atiekogi.

⁴² Ne girango koni gi koni, to onge ng’amaa ne nyalo resogi. Ne giywak ni Ruoth Nyasaye, to ne ok oduokogi.

⁴³ Ne aregogi mayom, mana ka buru ma yamo tero, mi anyonogi ka chuodho.

⁴⁴ Ne iresa kuom joma piem koda, kendo niketa jatelo mar ogendini, mi ji mane pok ang’eyo notiyona.

⁴⁵ Joma oa e pinje mamoko ne biro ira kobolore. Kane giwinjo humba, to ne giyie lochna mana gikanyono.

⁴⁶ Chunygi nool, mi ne giwuok ka gitetni, kuma ne gipondoe.

⁴⁷ Ruoth Nyasaye nitie. En e lwandana! Pakeuru! Ee, odend nying Nyasacha, ma lwanda mar resruokna.

⁴⁸ En e Nyasaye mane omiya teko mar chulo kuor, koketo ogendini e bwo lochna,

⁴⁹ Kendo kogola kuom wasika. En e Ruoth Nyasaye mane omiyo aloyo joma ne piem koda, kendo oresa kuom jomahundu.

⁵⁰ Kuom mano, anapake kuom kind ogendini. Adier, anapak nyinge gi wer.

⁵¹ Nyasaye kelo resruok maduong’ ni ruoth moketo. Ee, ohero ng’at moyiero, gi hera mosiko, ma en mana Daudi, gi kotha nyaka chieng’.”