2 Samuel 21 - MUMA MALER 2015

Jo-Gibeon ochulo kuor

¹ E ndalo Daudi ne nitie kech kuom higni adek, omiyo Daudi nopenjo Ruoth Nyasaye wach gimomiyo kejno obiro. Ruoth Nyasaye nodwoke niya, “Ketho ni kuom Saulo kod joodgi, nikech nochuero remb jo-Gibeon.”

² Kuom mano ruoth noluongo jo-Gibeon ire. (Jo-Gibeon ne ok gin jo-Israel to ne gin jo-Amor ma nodong’ mane jo-Isarel otimogo winjruok. Kata kamano Saulo ne dwaro negogi, nikech nodwaro ni mondo jo-Israel gi jo-Juda ogurre motegno.)

³ Daudi nopenjo jo-Gibeon niya, “Ere gima anyalo timonu? Ere kaka dagol richono, mondo umi hawi oduog ni jo-Ruoth Nyasaye?”

⁴ To jo-Gibeon nodwoke niya, “Wach manie kindwa gi Saulo kod joodgi ok en wach ma ditiek gi fedha kata dhahabu. Bende waonge gi teko mar nego ja-Israel moro.” Daudi nopenjogi kendo niya, “To ere gima udwaro mondo atimnu?”

⁵ Ne gidwoke ni, “We mondo watiek nying jal ma nohinyowa, ka dwaro tiekowa ni kik wadag e piny Israel.

⁶ Miwa yawuote abiriyo mondo waneg e nyim Ruoth Nyasaye Gibea, dala Saulo, ruoth mane Ruoth Nyasaye oyiero.” Daudi noyie, mochiwogi.

⁷ To ne ok ochiwo Mefibosheth wuod Jonathan ma wuod Saulo, nikech singruok ma notimo gi Jonathan e nying Ruoth Nyasaye.

⁸ To nokawo mana Armoni gi Mefibosheth, yawuowi ariyo mane Rizpa nyar Aya onywolo ni Saulo, kod yawuowi abich mane Merab nyar Saulo onywolo ni Adriel wuod Barzilai ja-Mehola.

⁹ Jogo ema ne ruoth ochiwo ni jo-Gibeon, mi jo-Gibeon nonegogi e nyim Ruoth Nyasaye e got. Ji abiriyogo duto notho kaachiel e ndalo keyo mar atamalo mar shairi.

¹⁰ Rizpa nyar Aya nopedho pien gugru ewi lwanda, mobedoe, chakre ndalo keyo, nyaka koth nochue, kendo notamo winy godiechieng’, kod ondiegi gotieno, mondo kik cham ringre jogo.

¹¹ Kane onyis Daudi gima Rizpa nyar Aya ma chi Saulo otimo,

¹² nodhi mokawo choke Saulo kod choke Jonathan wuod Saulo kuom jo-Jabesh-gilead. Noyudo jo-Jabesh-gilead osekawogi ling’ling’ e paw dala mar Bethshan, kama jo-Filistia nolierogie bang’ nego Saulo Gilboa.

¹³ Daudi noomo choke Saulo kod choke Jonathan wuode kanyo, kendo noketogi kaachiel gi choke joma oneg kande.

¹⁴ Ne gikawo choke Saulo gi mag Jonathan wuode, kaachiel gi mag joma noneg, mi giyiko Zeba e piny Benjamin, e liend Kish wuon Saulo. Ne gitimo duto mane ruoth ochiko, kendo bang’ mano, Nyasaye nokecho pinygi.

Abishai oreso Daudi e lwet thwon marabet

¹⁵ Kinde moro jo-Filistia nochako omonjo jo-Israel, mi Daudi gi jolwenje nodhi mojot Gob. Ne gikedo gi jo-Filistia, nyaka Daudi nodoko mool.

¹⁶ Ne nitie ja-Refaim moro mathwon, ma pek tong’e ne dirom kilo adek. Noting’o ligangla manyien, kendo noparo ni doneg Daudi.

¹⁷ To Abishai wuod Zeruya nobiro monego ja-Filistiano, mi Daudi otony. Bang’e jolwenj Daudi nosayo Daudi niya, “Kik ichak idhi kodwa e lweny, nimar dipo ka chieng’ moro onegi, to in ema ibedonwa ka taya e Israel.”

Joma rabede mane jo-Daudi onego

¹⁸ Bang’ mano, lweny nochako owuok e kind jo-Israel gi jo-Filistia, mi ne gikedo Gob. E lwenjno Sibekai ja-Husha nonegoe Saf ma ja-Refaim.

¹⁹ Lweny nowuok kendo e kind jo-Israel gi jo-Filistia e Gob. Mi Elhanan wuod Jair ma ja-Bethlehem nonego Goliath ja-Giti, ma bond tong’e ne chalo lodi.

²⁰ Lweny nochako owuok e Gath, kama ne nitie ng’at magana ma rabora man gi lith lwedo auchiel gi lith tielo auchiel koni gi koni. Lith lwetene gi mag tiendene duto koriw ne romo piero ariyo gang’wen. Jalo bende ne ja-Refaim.

²¹ To ka nothiano ni jo-Israel, Jonathan wuod Shimea owadgi Daudi nonege.

²² Ji ang’wen-go duto ne jo-Refaim ma oganda joma rabede, to Daudi gi joge nonegogi duto.