2 Samuel 10 - MUMA MALER 2015

Daudi oloyo jo-Amon gi jo-Aram

¹ Bang’e ruoth Amon notho, mi Hanun wuode nodoko ruoth kare.

² Daudi nowacho niya, “Abiri timo ni Hanun wuod Nahash maber, mana kaka wuon mare notimona maber.” Omiyo nooro joote mondo oduog chuny Hanun kuom tho wuon mare. To kane joote Daudi ochopo e piny jo-Amon,

³ jotend jo-Amon nowacho ni Hanun ruodhgi niya, “Bende iparo ni Daudi oseoro joge mondo omi wuoru duong’? Ooyo, oseorogi mana ni mondo gicheng dala, eka oyud yo monyalo loyego.”

⁴ Kuom mano, Hanun nomako joote Daudi, molielo tikgi nyakulchiel, kendo ong’ado lepgi nyabathe, chakre nungogi kalor piny; bang’e noriembogi.

⁵ Kane onyis Daudi wachno, nooro ji mondo orom ni jootego, nikech ne giyudo wichkuot maduong’. Nowacho mondo gibed Jeriko mondi nyaka yie tikgi dongi, eka giduogi.

⁶ Jo-Amon noneno ni gisemiyo Daudi ojok kodgi, omiyo ne giholo jolweny alufu piero ariyo kuom jo-Aram ma Beth-rehob, kod jo-Aram ma Zoba, kendo ne giwako ruoth Maaka kod joge alufu achiel kaachiel gi jo-Tob alufu apar gariyo.

⁷ Kane Daudi owinjo wachno, nooro Joab kod joma rateke duto, mondo oked kodgi.

⁸ Jo-Amon nowuok, mi ne giriedo ni lweny e dhoranga dala, to jo-Aram ma Zoba, kod ma Rehob, kaachiel gi jo-Tob kod jo-Maaka nochanore e pap.

⁹ Kane Joab oneno ni lweny olwore, noyiero thuond jo-Israel moko, mochano kochomo jo-Aram,

¹⁰ to jomoko duto modong’ noketo e lwet Abishai owadgi, mi Abishai nochanogi ka gichomo jo-Amon.

¹¹ Joab nowacho ni Abishai niya, “Kineno ka jo-Aram tek madwaro loya, to nyaka ibi ikonya. To ka jo-Amon dwaro loyi, to nabi akonyi.

¹² Bed gi chir, waked matek ni jowa. To Ruoth Nyasaye mondo otim gima oneno ni ber.”

¹³ Kamano Joab gi joge norado gi jo-Aram moriembo.

¹⁴ Kane jo-Amon oneno ni jo-Aram ringo, gin bende ne giringo Abishai, mi gidonjo e dalagi. Eka Joab noweyo kedo kodgi, modok Jerusalem.

¹⁵ Kane jo-Aram oneno ni jo-Israel oseloyogi, ne gichokore kanyakla.

¹⁶ Hadadezer nooro joote mondo oluong jo-Amon ma nodak loka aora Yufrate, mi ne gibiro Helam, ka Shobak jatend oganda lweny mar Hadadezer otelonigi.

¹⁷ Kane Daudi oyudo wach ni gibiro, nochoko jolwenj Israel duto kanyakla, mi giidho loka Jordan mondo girad kodgi Helam. Jo-Aram noriedo ni lweny kochomo Daudi gi joge, mi ne girado.

¹⁸ To jo-Israel noloyogi, mi giringo, kendo Daudi gi joge nonego jogi ma joidh geche mia abiriyo, kod joidh farese alufu piero ang’wen. Bende ne gigoyo Shobak jatendgi, motho kanyo.

¹⁹ To kane ruodhi duto manie bwo Hadadezer oneno ni jo-Israel oloyogi, ne giywagorenigi, mi gibedo e bwo lochgi. Bang’ mano jo-Aram ne ok ohedhore konyo jo-Amon kendo.