2 Samuel 1 - MUMA MALER 2015

Daudi owinjo wach tho Saulo

¹ Kane Daudi oseduogo koa nego jo-Amalek, nonindo Ziklag ndalo ariyo.

² Chieng’ mar adek ka Saulo osetho, ng’at moro nobiro moa e lweny koyiecho lepe, kendo obuko wiye buru. Kane ochopo ir Daudi, nokulore piny, komiye duong’.

³ Daudi nopenje niya, “Ia kanye?” Nodwoko ni, “Nyocha apondo aa e kambi lweny mar jo-Israel.”

⁴ Daudi nomedo penje niya, “Ang’o motimore kuno? Wachna.” Nodwoke ni, “Jo-Israel oseringo oa e lweny, to thothgi osetho. Saulo gi Jonathan wuode bende josetho.”

⁵ Eka Daudi nomedo penje kendo niya, “Ere kaka ing’eyo gi Saulo gi Jonathan wuode josetho?”

⁶ Wuowino nowacho niya, “Noyudo an e got Gilboa, kendo naneno Saulo kosirore gi tong’e, to geche lweny gi joidh farese lwore machiegni.

⁷ To kane ogoyo machiemo, nonena, moluonga. Nadwoke ni, ‘Era e.’

⁸ Eka nopenja ni, ‘In ng’a?’ Nadwoke ni, ‘An ja-Amalek.’

⁹ Eka nowachona niya, ‘Bi ka, inega, nikech an gi rem malit, to pod angima.’

¹⁰ Omiyo nasudo bute, manege, nikech nang’eyo ni ok onyal bedo mangima, kosehinyore kamano. Bang’e nakawo osimbo mane ni e wiye, kod ronge mane ni e bade, kendo ekigi.”

¹¹ Kane Daudi owinjo wachno, noyiecho lepe owuon, kendo ji duto mane ni kode bende notimo kamano.

¹² Ne gisedo ka giywago Saulo gi Jonathan wuode kod jo-Ruoth Nyasaye, ma tiende ni jo-Israel. Bende ne gitueyo chiemo nyaka piny oyuso, ka giparo joma otho e lwenygo.

¹³ Daudi nopenjo wuowi ma nokelone wachno niya, “In jakanye?” Nodwoke niya. “An wuod ja-Amalek ma jadak.”

¹⁴ Daudi nowachone ni, “Marang’o ne ok iluoro tero lweti kuom ruoth mowir ma Ruoth Nyasaye oyiero?”

¹⁵ Eka noluongo wuowi moro kuom joge mowachone niya, “Bi inege.” Mi jalo nogoyo ng’atno motho.

¹⁶ Daudi nowacho niya, “Rembi obed e wiyi, nimar dhogi iwuon ema ong’adoni bura, kiwacho ni isenego ruoth mowir ma Ruoth Nyasaye oyiero.”

Daudi oywago Saulo gi Jonathan

¹⁷ Daudi nochwogo wend ywak ni Saulo gi Jonathan wuode.

¹⁸ Nochiko ni mondo jo-Juda opuonjre wendno kendo ondike e kitap Jasher, kama:

¹⁹ “A Israel, jou madongo osenegi e godeu! Yaye, joma rateke osepodho.

²⁰ Kik ihul wachni e Gath. Kik igo milome mare e wang’yore mag Ashkelon, dipo ka mond Filistia obedo mamor. Ee, dipo ka nyi joma kia Nyasayego obedo moil.

²¹ Un gode mag Gilboa, kik tho mok kuomu. Un puothe mag kuoyo, kik koth chue kuomu, nikech kuondegoo ema kuodi mag joma rateke odong’ie, ka kethore, kaachiel gi kuod Saulo, ma koro ok owir gi mo.

²² Atung’ Jonathan ne ok duog nono, mak ochuero remo, kata mak ong’olo boche mag joma rateke. Ligangla Saulo bende ne ok duog nono.

²³ Saulo gi Jonathan ne joma oher kendo joma beyo. Ne ok gipogore e ngimagi kata e thogi. E ng’uech, ne giyot kongo. Ne gin rateke moloyo sibuor.

²⁴ Un nyi Israel, ywaguru Saulo! En ema norwakou gi lewni makwar kendo mabeyo, kendo en ema noketonu dhahabu e lepu.

²⁵ Yaye! Mano kaka joma rateke osepodho e lweny. Oneg Jonathan e lweny mager. A Jonathan, chunya lit nikech itho.

²⁶ Ne ageni ahinya, kendo gen ma nigenago ne lich miwuoro. Ne okadho hera ma mon herogo chwogi.

²⁷ Yaye! Joma rateke osepodho, kendo gigi mag lweny olal nono!”