2 Ruodhi 8 - MUMA MALER 2015

Odwok ni chi Shunem lope

¹ Elisha nosenyiso dhako mane ochierone wuode cha niya, “Dar gi joodi, udhi udag kamoro amora ma unyalo yudoe thuolo, nikech Ruoth Nyasaye biro kelo kech e piny kuom higni abiriyo.”

² Kamano dhakono nodhi motimo kaka ng’at Nyasaye nowachone. Nodar gi joode modhi odak e piny jo-Filistia kuom higni abiriyo.

³ Kane higni abiriyogo oserumo, dhakono noduogo koa e piny jo-Filistia, mi nodhi mondo okwa ruoth odwokne ode gi puothe.

⁴ To noyudo ka ruoth penjo Gehazi jatich ng’at Nyasaye ni mondo onyise gik madongo duto ma Elisha osetimo.

⁵ Kane pod Gehazi nyiso ruoth kaka Elisha nochiero ng’at motho, nopo ka min wuowi mane ochierono obiro, mokwayo ruoth mondo odwokne ode gi puothene. Mi Gehazi nowacho ni ruoth niya, “Ruodha, ma e dhako nogono, kendo ma e wuode mane Elisha ochiero!”

⁶ Ruoth nopenjo dhakono wachno, mi dhakono nonyise gik ma notimore. Eka ruoth nomiye jaduong’ moro kowachone niya, “Los wach dhakoni, mondo odwokne gige duto, kaachiel gi cham duto mosenyak e puothene, chakre chieng’ mane oaye ka, nyaka chil kawuono.”

Hazael odoko ruodh Aram

⁷ Chieng’ moro Elisha nodhi Damaski, moyudo ka Ben-hadad ruodh Aram tuo. Kane ruoth owinjo ni ng’at Nyasaye obiro.

⁸ Nowacho ni Hazael niya, “Kaw mich, idhi irom godo ni ng’at Nyasaye, kendo ikwaye mondo openj Ruoth Nyasaye ka abiro kwo.”

⁹ Kamano Hazael nodhi romo ni Elisha, kotero ne mich mang’eny mogolo Damaski, moromo ngamia piero ang’wen ting’o. Kane oromo kode, nochung’ e nyime, mowachone niya, “Ben-hadad ruodh Aram ma nyathini oora ni mondo apenji kobiro kwo.”

¹⁰ Elisha nodwoke niya, “Dhiyo, iwachne ni obiro kwo. To kata kamano, Ruoth Nyasaye osenyisa malong’o ni obiro tho.”

¹¹ Eka wang’ Elisha notwo kuome kang’iye, nyaka wi Hazael nokuot, to pi wang’ ng’at Nyasaye noton.

¹² Hazael nopenje niya, “Jaduong’, iywago ang’o?” Nodwoke niya, “Aywak nikech ang’eyo kaka ibiro sando jo-Israel. Iniwang’ miechgi mochiel gi ohinga, kendo inineg yawuotgi marateke. Inikidh nyithindgi matindotindo, bende iniried iye mondegi mayach.”

¹³ To Hazael nopenje ni, “To an anani, ere kaka danyal timo gima duong’ kamano?” Elisha nodwoke niya, “Ruoth Nyasaye osenyisa ni ibiro bedo ruodh Aram.”

¹⁴ Eka Hazael noa ir Elisha, modok ir ruodhe. Ruoth nopenje gima Elisha owachone, mi Hazael nodwoke niya, “Nonyisa ni ibiro kwo maonge kiawa.”

¹⁵ To kinyne noumo wang’ ruoth gi nanga moluti e pi, mothung’e nyaka otho. Eka nobet ruoth kare.

Loch Jehoram, ruodh Juda

¹⁶ E higa mar abich mar loch Joram wuod Ahab, ruodh Israel, Jehoram wuod Jehoshafat nodoko ruodh Juda.

¹⁷ Ne en jahigni piero adek gariyo kochako tich ruoth, kendo norito piny kuom higni aboro, kodak Jerusalem.

¹⁸ Noluwo timbe ruodhi mag Israel, kaka jodhood Ahab notimo, nikech nokendo nyar Ahab. Timbene ne richo e nyim Ruoth Nyasaye.

¹⁹ To kata kamano, Ruoth Nyasaye ne ok otieko jo-Juda, nikech noparo Daudi jatichne, nimar nosesingorene ni anywolane nobed e kom duong’ ka taya malielne nyaka chieng’.

²⁰ E ndalo loch Jehoram, jo-Edom nodagi bet e bwo loch Juda, mi ne giketo ruodhgi giwegi.

²¹ Omiyo Jehoram noidho loka nyaka Zair, kaachiel gi gechene duto mag lweny, to jo-Edom nolworogi. Mi Jehoram gi jotend gechene nochiew gotieno, momwomo, to joge duto noringo, modok miechgi.

²² Mano e kaka jo-Edom notieko loch Juda Edom nyaka chil kawuono. E ndalogo Libna bende nodagi bet e bwo loch Juda.

²³ Koro weche moko mag Jehoram, kod timbene duto, ondiki e Kitap Weche mag Ndalo mag Ruodhi mag Juda.

²⁴ Jehoram notho, mi noyike but kwerene e dala Daudi. Ahazia wuode nodoko ruoth kare.

Loch Ahazia, ruodh Juda

²⁵ E higa mar apar gariyo mar loch Joram wuod Ahab ruodh Israel, Ahazia wuod Jehoram nodoko ruodh Juda.

²⁶ Ahazia ne jahigni piero ariyo gariyo kane ochako tich ruoth, kendo norito piny kuom higa achiel, kodak Jerusalem. Min mare ne nyinge Athalia, nyakwar Omri ruodh Israel.

²⁷ Ahazia bende noluwo timbe dhood Ahab. Timbene ne richo e nyim Ruoth Nyasaye, mana kaka timbe Ahab, nikech ne en or jodhood Ahab.

²⁸ Ahazia gi Joram wuod Ahab ne jodhi Ramoth-gilead mondo oked gi Hazael ruodh Aram, to nopo ka jo-Aram ohinyo Joram kuno.

²⁹ Mi ruoth Joram nodok Jezreel ni mondo ochang kuom hinyruok ma noyudo Ramoth kokedo gi Hazael ruodh Aram. Eka Ahazia wuod Jehoram, ruodh Juda, nodhi Jezreel mondo one Joram wuod Ahab nikech Joram ne tuo.