2 Ruodhi 7 - MUMA MALER 2015

¹ To Elisha nowacho niya, “Winjuru wach Ruoth Nyasaye. Ruoth Nyasaye owacho niya, ‘Kiny, kar sa makama, nengo atonga mar mogo mayom nobed otonglo achiel e dhoranga Samaria, kendo atonge ariyo mag shairi bende otonglo achiel.’ ”

² Jaduong’ lweny ma nyagach ruoth nowacho ni ng’at Nyasaye niya, “Bende gini ditimre adier, kata da Ruoth Nyasaye yaw dirise polo?” To nodwoke niya, “Ibiro nene gi wang’i, to ok nichame!”

³ Noyudo ka jodhoho ang’wen obet e dhoranga Samaria. Ne gipenjore niya, “Ere gima omiyo warito mondo watho ka?

⁴ Kwadonjo e dala, to kech ni kuno, wabiro tho. Kata kwamedo bet ka, pod wabiro mana tho. Ber wadog ni jo-Aram. Ka ging’wononwa, to wanabed mangima. To kata ka gidagi, bende watho.”

⁵ Omiyo kane chieng’ osepodho, ne giwuok mondo gidhi kuma jo-Aram ojotie. To kane gichopo e dho kambigi, ne gipo ka onge kata ng’at achiel kanyo,

⁶ nimar Ruoth Nyasaye nosemiyo oganda jo-Aram owinjo koko mar geche gi farese, machalo oganda maduong’, mi giwacho kendgi niya, “Winjuru! Ruodh Israel osewako ruodhi mag jo-Hiti gi mag jo-Misri mondo obi oked kodwa.”

⁷ Omiyo kar ang’ich welo ne giringo mondo gitony, ka giweyo hembegi gi faresegi kod kenjegi e kambi.

⁸ Kuom mano, kane jodhohogo ochopo e dho kambi, ne gidonjo e hema moro, mi gichiemoe kendo gimethoe. Eka ne gipeyo fedha gi dhahabu kod lewni, mi gidhi gipando. Ne gidok kendo ne gipeyo gik mane nie hema machielo. Gigo bende ne gidhi gipando.

⁹ Eka ne giwacho kendgi niya, “Yawa! Ok watim maber. Ma en odiechieng’ mar mor, to waling’ aling’a nadi? Kwagalore kama nyaka piny oru, to wabiro neno masira. Omiyo koro wadhiuru mondo wanyis jood ruoth gima otimore.”

¹⁰ Mi ne gidok, kendo ne giluongo jorit ranga dala, ka giwachonigi niya, “Nende wachopo e kambi mar jo-Aram, to ne ok waneno ng’ato, kata winjo dwol moro ne ok wawinjo, mak mana hembe gi farese kod kenje motue e loyegi.”

¹¹ Eka jorit rangach nogoyo koko, mi wach noter ni jood ruoth.

¹² Ruoth nochiew gotieno, mowacho ni jodonge mag lweny niya, “Winjuru gima jo-Aram dwaro timonwa. Ging’eyo ni wadenyo, omiyo gisewuok e kambigi, to gipondo mana e bungu, ka giparo ni gibiro makowa kwawuok, eka gidonj e dalawa ka.”

¹³ To achiel kuom jodonge nowacho niya, “Yie mondo ji moko odhi gi farese abich modong’, nikech farese duto biro tho mana kaka jo-Israel mang’eny osetho. We waorgi mondo wane gima timore.”

¹⁴ Omiyo ne giluongo joidh farese ariyo, mi ruoth noorogi mondo giluw bang’ oganda lweny mar jo-Aram, kowachonigi niya, “Dhiuru, une gima otimore.”

¹⁵ Kuom mano, ne giluwo jo-Aram nyaka aora Jordan, mi giyudo lewni kod gik moko mang’eny mane jo-Aram owito e yo, ka gireto nikech kibaji. Eka jootego nodok, monyiso ruoth gima ne gineno.

¹⁶ Omiyo ji duto nowuok, moyako kambi jo-Aram, kendo atonga mar mogo mayom ning’iewo otonglo achiel, kaka Ruoth Nyasaye nowacho.

¹⁷ Ruoth noketo jaduong’ lweny ma nyagache cha mondo obed jatend jorit rangach, to ji nonyone piny e dhorangach, motho, mana kaka ng’at Nyasaye nowacho, chieng’ mane ruoth obiro ire.

¹⁸ (Ng’at Nyasaye nosewacho ni ruoth niya, “Kiny kar sa makama, nengo atonge ariyo mag shairi nobed otonglo achiel, kendo nengo atonga mar mogo mayom bende otonglo achiel.”

¹⁹ Jaduong’ lweny cha nosewacho ni ng’at Nyasaye niya, “Bende gini ditimre adier, kata da Ruoth Nyasaye yaw dirise polo?” To Elisha nosedwoke niya, “Ibiro neno gi wang’i to ok inichame.”

²⁰ Kendo kamano e kaka notimorene, nikech ji ne onyone e dhorangach, motho.)