2 Ruodhi 6 - MUMA MALER 2015

Le molwar e aora, olewore e pi

¹ Oganda mar jonabi nowacho ni Elisha niya, “Kama wadakie kodini tin, wahewo.

² We wadhi aora Jordan mondo ng’ato ka ng’ato otong’ yien, wagergo udi.” Nodwoke niya, “Ayie dhiuru.”

³ To ng’ato achiel kuomgi nokwayo Elisha ni, “Yie idhi kodwa” Mi noyie,

⁴ modhi kodgi. Kane gichopo e aora Jordan, ne gichako tong’o yien.

⁵ To kane oyudo ng’at moro tong’o yien, wi leye nolwar e pi, mi noywak kowacho niya, “Ruoth, hapa rach, nikech en le ma aholo.”

⁶ Ng’at Nyasaye nopenje niya, “Olwar gi kanye?” Kane jalo onyise, Elisha nong’ado luth, mobolo kanyono, mi le nolewore.

⁷ Elisha nokone ni, “Kawe.” Mi ng’atno notero lwete, mokawe.

Elisha gi jo-Aram

⁸ Chieng’ moro kane jo-Aram kedo gi jo-Israel, noporo wach gi jotende mag lweny, konyisogi kuma obiro butoe.

⁹ To ng’at Nyasaye nooro ni ruodh Israel wach, kanyise niya, “Kik iluw yorno, nikech jo-Aram obuto kuno.”

¹⁰ Eka ruodh Israel nooro ji kuma ng’at Nyasaye nosenyise. Kamano e kaka Elisha ne thoro timo, omiyo ruoth noresore ndalo mogwarore.

¹¹ Wachno nothago chuny ruodh Aram ahinya, mi noluongo jodonge, mopenjogi niya, “Dak unyisa ng’atwa ma konyo ruodh Israel?”

¹² Achiel kuom joge nodwoke niya, “Ruoth, onge ng’atwa moro amora, to mak mana Elisha janabi ema nyiso ruodhgi gik miwacho kata ka in e odi mar nindo.”

¹³ Ruoth nowacho niya, “Dhiuru mondo udwar kuma entie, eka naor ji odhi omake.” Ne ginyise ni, “En Dothan.”

¹⁴ Omiyo nooro farese gi geche kod oganda lweny maduong’. Ne gichopo kuno gotieno, mi gilworo dalano.

¹⁵ Ka ne ng’at Nyasaye ochiew gokinyi, nowuok oko, moneno oganda lweny man gi farese kod geche kolworo dala. Jatichne nowach niya, “Ruodha, wadiwo! Ti wanatim ang’o?”

¹⁶ Nodwoke niya, “Kik iluor, nimar jowa ng’eny moloyogi.”

¹⁷ Eka Elisha nokwayo Ruoth Nyasaye niya, “Asayi, yaw wang’ jali mondo onen.” Ruoth Nyasaye noyawo wang’ wuowino, mi noneno ka got opong’ gi farese kod geche mag mach, ka rito Elisha.

¹⁸ Kane jo-Aram obiro monjo Elisha, nokwayo Ruoth Nyasaye niya, “Lok jogi muofni.” Mi Ruoth Nyasaye nolokogi muofni mana kaka Elisha nokwaye.

¹⁹ Eka Elisha nowachonigi niya, “Ma ok e yo, kendo ok enie dala mudwaro. Luwauru mondo ateru ir ng’at mudwarono.” Eka noterogi nyaka Samaria!

²⁰ To kane gidonjo Samaria, Elisha nowacho niya, “A Ruoth Nyasaye, koro yaw wang’gi mondo ginen.” Kamano Ruoth Nyasaye noyawo wang’gi, mi ne gipo ka gin mana e dier Samaria!

²¹ Kane ruodh Israel onenogi, nopenjo Elisha niya,, “Wuonwa, aneggi koso?”

²² To nodwoke ni, “Kik ineggi! Bende dineg ji mimako e lweny adier? Migi chiemo mondo gichiem, eka gidog ir ruodhgi.”

²³ Omiyo nolosonigi chiemo mathoth, to kane gisechiemo kendo gimetho, noweyogi, mi gidok ir ruodhgi. Chakre kanyo, jo-Aram ne ok ochako omonjo jo-Israel.

Wach mane Elisha okoro ka jo-Aram olworo Samaria

²⁴ Bang’ mano, Ben-hadad, ruodh Aram nochoko joge duto mag lweny, modhi olworo Samaria mondo okaw.

²⁵ Ne gilwore aming’a, nyaka kech maduong’ nomako jo-Samaria. Wi kanyna ning’iewo gi fedha moromo kilo achiel, to ondong’ mar owuoch akuru ning’iewo gi fedha moromo achiel kuom piero ariyo mar kilo.

²⁶ Chieng’ moro kane ruodh Israel oyudo wuotho ewi ohinga mar dala, dhako moro noywakne kawacho niya, “Yaye ruoth, konya!”

²⁷ Ruoth nodwoke niya, “Ka Ruoth Nyasaye ok konyi, an to dakonyi nadi? Dakonyi gi cham, koso gi divai?”

²⁸ Eka ruoth nomedo penje ni, “Ang’o machandi?” Nodwoke niya, “Dhako moro nowachona ni mondo achiw wuoda wacham, to kinyne wacham mare.

²⁹ Omiyo ne watedo wuoda, mwachamo. To kinyne kane awachone ni mondo ochiw wuode wacham, to nayudo kosepande.”

³⁰ Kane ruoth owinjo wach dhakono, noyiecho lepe. (Wachno notimore ka ruoth wuotho ewi ohinga, mi ji nong’iye, moneno ni pien gugru ema orwako ei lepe.)

³¹ Nowacho niya, “Nyasaye mondo okweda ka ok ang’ado wi Elisha wuod Shafat oko kawuono!”

³² Noyudo ka Elisha obet ewi ode kaachiel gi jodongo. Ruoth nooro jaote ire, to kane pok jaoteno ochopo, Elisha nowacho ni jodongo niya, “Uneno kaka ng’at ma janekno oro ng’ato mondo obi ong’ad wiya oko? Ka jaoteneno ochopo ka, to ulor dhoot matek, nikech ruodhe luwo bang’e machiegni.”

³³ Kane pod owuoyo kodgi, ruoth nochopo, mowacho niya, “Masirani oa mana kuom Ruoth Nyasaye, omiyo onge tiende, medo rito Ruoth Nyasaye mondo okonywa!”