2 Ruodhi 24 - MUMA MALER 2015

¹ E ndalo Jehoyakim, Nebukadnezar ruodh Babulon nobiro, mi Jehoyakim nobet e bwo lochne kuom higni adek. To bang’e nopiem kode, modagi lochne

² Eka Ruoth Nyasaye nooro mony mag jo-Babulon gi mag jo-Aram, gi mag jo-Moab kod mag jo-Amon, mondo oked gi jo-Juda, kendo ne giketho pinygi chuth, kaka Ruoth Nyasaye nosemiyo jatichne ma janabi owacho.

³ Adier, gigo notimore kuom jo-Juda mana kaka Ruoth Nyasaye nowacho, ni mondo ogolgi e nyime. Ruoth Nyasaye nodagi weyonigi kethogi, nikech richo mane Manase otimo,

⁴ kopong’o Jerusalem gi remb joma onge ketho.

⁵ Weche moko mag Jehoyakim gi timbene duro, ondiki e Kitap Weche mag Ndalo mag Ruodhi mag Juda.

⁶ Jehoyakim notho, moluwo kwerene, mi Jehoyachin wuode nodoko ruoth kare.

⁷ Ruodh Misri ne ok owuok kendo e pinye, nimar ruodh Babulon nosemaye pinje duto mane nie bwo lochne, chakre aora manie tong’ Misri nyaka chop aora Yufrate.

Jehoyachin gi jodong Juda oter Babulon e tuech

⁸ Jehoyachin ne jahigni apar gaboro kane odoko ruoth, morito piny kuom dueche adek kende, kodak Jerusalem. Min mare ne nyinge Nehushta nyar Elnathan ma ja-Jerusalem.

⁹ Timbe Jehoyachin ne richo e nyim Ruoth Nyasaye mana kaka timbe wuon mare.

¹⁰ Ndalono jolwenj Nebukadnezar ruodh Babulon nodhi monjo Jerusalem kendo ne gilworo dalano.

¹¹ Kane pod gilworo Jerusalem, Nebukadnezar nodhi kuno owuon,

¹² mi piny nohewo Jehoyachin, mochiwore ni ruodh Babulon, kaachiel gi min mare, gi jong’adne rieko, gi jodonge kod jotende. Nomake e higa mar aboro mar loch ruodh Babulon.

¹³ Nebukadnezar nokawo gik mabeyo duto mane nie Od Ruoth Nyasaye, kod mane nie kar keno mar od ruoth, kendo nong’ado ong’ado gik moko duto mag dhahabu mane Solomon ruodh Israel oloso, mane nie Od Ruoth Nyasaye. Kamano wach Ruoth nochopo kare.

¹⁴ Nebukadnezar nodaro jo-Jerusalem duto, kotero jodongo kod jomwandu ma dirom alufu apar e tuech kaachiel gi jotheth, kod ji duto molony kuom tich lwedo. Onge ng’ato mane odong’ mak mana joma odhier.

¹⁵ Ruoth kaachiel gi min mare, gi monde gi jotende, kod jodong gwenge.

¹⁶ Nogolo jogo duto Jerusalem kaachiel gi jomwandu duto ma dirom alufu abiriyo, gi jotheth kod joma olony kuom tich lwedo ma dirom alufu achiel. Giduto ne gin joma otegno, moromo lweny.

¹⁷ To ruodh Babulon noketo Matania ma owadgi wuon Jehoyachin mondo obed ruoth kar Jehoyachin. Noloko nying Matania ni Zedekia.

Loch Zedekia, ruodh Juda

¹⁸ Zedekia ne jahigni piero ariyo gachiel kane odoko ruoth, morito piny kuom higni apar gachiel, kodak Jerusalem. Min mare ne nyinge Hamutal nyar Jeremia ma ja-Libna.

¹⁹ Timbe Zedekia ne richo e nyim Ruoth Nyasaye, mana kaka timbe Jehoyakim.

²⁰ Jo-Jerusalem gi jo-Juda nomiyo Ruoth Nyasaye mirima, nyaka nogologi e nyime.