2 Ruodhi 22 - MUMA MALER 2015

Loch Josia, ruodh Juda

¹ Josia ne jahigni aboro kane odoko ruoth, morito piny kuom higni piero adek gachiel, kodak Jerusalem. Min mare ne nyinge Jedida nyar Adaya ma ja-Bozkath.

² Timbe Josia ne long’o e nyim Ruoth Nyasaye, kendo noluwo timbe duto mag Daudi kwar mare, ma ok oweyo kata achiel.

Kitap Chik oyudi e Hekalu

³ Kane Josia obedo ruoth, kuom higni apar gaboro, nooro Shafan jagoro wuod Azalia ma wuod Meshulam e Od Ruoth Nyasaye, kowachone niya,

⁴ “Dhiyo ir Hilkia jadolo maduong’, inyise mondo okwan kar romb pesa mosekel ei Od Ruoth Nyasaye, ma jorit osechoko kuom ji.

⁵ Pesago mondo oket e lwet nyipeche marito tich Od Ruoth Nyasaye,

⁶ mondo gichulgo jotich bao gi jogedo kod jopa kite maloso kuonde mokethore e Od Ruoth Nyasaye, kendo mondo ging’iewgo yien gi kite mopa milosogo kuonde mokethorego.

⁷ To kik penjgi kaka gitiyo gi pesa momigi, nikech gin joma ogen.”

⁸ Kindeno ema Hilkia jadolo maduong’ nowachoe ni Shafan jagoro niya, “Aseyudo Kitap Chik e Od Ruoth Nyasaye.” Mi nomiyo Shafan kitabuno, mosomo.

⁹ Shafan jagoro notero ni ruoth wach niya, “Jotichni osegolo pesa mane oyud e Od Ruoth Nyasaye, kendo gisemiyo nyipeche marito tich odno.”

¹⁰ Eka nomedo wacho ni ruoth niya, “Hilkia osemiya kitabu moro.” Mi nosome ni ruoth.

¹¹ Kane ruoth owinjo weche manie kitap chik, noyiecho lepe.

¹² Eka nochiko Hilkia jadolo, gi Ahikam wuod Shafan gi Akbor wuod Mikaya, gi Shafan jagoro, kod Asaya jatich ruoth, niya,

¹³ “Dhiuru upenj Ruoth Nyasaye gima biro timorena, kendo ni jo-Juda duto, nikech weche manie kitabu mwaseyudoni. Nyaka bed ni Ruoth Nyasaye okecho kodwa malich, nikech kwerewa ne ok orito chike manie kitabuni, kata timo gik moko duto mondikie.”

¹⁴ Omiyo Hilkia jadolo gi Ahikam gi Akbor gi Shafan kod Asaya ne jodhi ir Hulda janabi madhako ma chi Shalum wuod Tikva, ma wuod Harhas, jarit lep lemo, mane odak Jerusalem e migawo mar ariyo. Ne giwuoyo kode,

¹⁵ mi nodwokogi niya, “Nyisuru ng’at mane oorou ira ni

¹⁶ Ruoth Nyasaye ma Nyasach Israel owacho kama: ‘Abiro kelo masira e pinyni, kendo kuom joma odakie, kaluwore gi weche duto manie kitabu ma ruodh Juda osesomo.

¹⁷ Ne gikwinya gi timbegi ka giweya, kendo ka giwang’o ubani ni nyiseche manono. Emomiyo mirimba nobed mager kuom pinyni, kendo ok norum.’

¹⁸ To wachuru ni ruodh Juda mane oorou mondo upenjne Ruoth Nyasaye wach, ni Ruoth Nyasaye owacho kama:

¹⁹ ‘Kane iwinjo wechena mane awacho kuom pinyni kod joma odakie, ni ginibed joma okuong’ kendo okwedi, chunyi ne yom, kendo odembore, miyiecho lepi kendo iywak e nyima. Emomiyo an bende asewinjo ywakni.

²⁰ Noyiki e liendi gi kue, kiluwo kwereni, ma kata wang’i ok none masira ma abiro kelo kae.’ ”