2 Ruodhi 21 - MUMA MALER 2015

Loch Manase, ruodh Juda

¹ Manase ne jahigni apar gariyo kane odoko ruoth, morito piny kuom higni piero abich gabich, kodak Jerusalem. Min mare ne nyinge Hefziba.

² Timbe Manase ne richo e nyim Ruoth Nyasaye, kaka timbe makuero mag ogendini mane Ruoth Nyasaye oriembo mondo owe thuolo ni jo-Israel.

³ Nochako oloso hembko mane ni kuonde moting’ore mane Hezekia wuon mare oseketho, kendo nogero kuonde liswa ni Baal. Nochungo siro milamo miluongo ni Ashera, kaka Ahab ruodh Israel notimo, bende nolamo sulue duto, kotiyonigi.

⁴ Nogero kende mag liswa e Hekalu mane Ruoth Nyasaye osewuoyo kuome niya, “Jerusalem ema naketie nyinga.”

⁵ Bende nogero kende mag misango ni sulue duto e laru ariyo mag Od Ruoth Nyasaye.

⁶ Nowang’o wuode bende, kotimogo misango. Noyie gi jokor wach gi jo nyakalondo kod ajuoke. Timbene maricho ne ng’eny e nyim Ruoth Nyasaye, omiyo mirima nomako Ruoth Nyasaye.

⁷ Siro milamo mane oseloso, nochungo ei Hekalu, to Ruoth Nyasaye nosewuoyo kuom Hekaluno, kawacho ni Daudi gi Solomon wuod Daudi niya, “Aseyiero Hekaluni gi Jerusalem kuom dhoudi duto mag Israel mondo nyinga obedie nyaka chieng’.

⁸ Ka jo-Israel orito gik moko duto mane achikogi, kendo gitimogi, bende ka giluwo chike duto mane Musa jatichna onyisogi, to ok nariembgi e piny mane amiyo kweregi.”

⁹ To ne gitamore winjo, kendo Manase nosemogi ni mondo gimed timbegi maricho e nyim Ruoth Nyasaye moloyo ogendini mane Ruoth Nyasaye otieko mondo owe thuolo ni jo-Israel.

¹⁰ Ruoth Nyasaye nomiyo jotichne ma jonabi owacho niya,

¹¹ “Manase ruodh Juda osetimo tim makuero, kod richo madongo moloyo mago duto mane jo-Amor otimo chon, kendo osemiyo jo-Juda bende obedo joricho, nikech nyisechene manono.

¹² Emomiyo abiro kelo masira malich kuom Jerusalem gi Juda, ma ka ng’ato owinjo, to ite nopopni.

¹³ Abiro pimo Jerusalem gi tol mane apimogo Samaria, kendo gi rapim mane apimogo dhood Ahab. Abiro nang’o Jerusalem mapoth, mana kaka kungu nang’o puodho.

¹⁴ Anawit joga awuon modong’, kendo anachiwgi e lwet wasikgi duto, mondo opegi, kendo oyakgi,

¹⁵ nikech gisemiya mirima gi timbegi maricho, chakre ndalo mane kweregi owuokie Misri nyaka chil kawuono.”

¹⁶ To ewi richo duto mane Manase otimo, komiyogo jo-Juda obedo joricho e nyim Ruoth Nyasaye, en ni nomedo chuero remb ji mang’eny maonge ketho, nyaka remo nomol ka ohula e Jerusalem.

¹⁷ Weche moko mag Manase, gi timbene duto, gi richo mane otimo, ondiki e Kitap Weche mag Ndalo mag Ruodhi mag Juda.

¹⁸ Manase notho, moyike e orundune mane nie puoth Uza. Amon wuode nodoko ruoth kare.

Loch Amon, ruodh Juda

¹⁹ Amon ne jahigni piero ariyo gariyo kane ochako tich, morito piny kuom higni ariyo, kodak Jerusalem. Min mare ne nyinge Meshulemeth nyar Haruz ma ja-Jotba.

²⁰ Timbe Amon ne richo e nyim Ruoth Nyasaye mana kaka timbe Manase wuon mare.

²¹ Noluwo yore duto mane wuon mare oluwo, kotiyo ni nyiseche manono mane wuon mare tiyonigi, kendo kokulorenigi.

²² Noweyo Ruoth Nyasaye ma Nyasach kwerene, kendo notamore luwe.

²³ Jodong ruoth Amon nojame, monege e ode.

²⁴ To jo-Juda nonego jogo duto mane ojame, kendo ne giketo Josia wuode mondo obed ruoth kare.

²⁵ Weche moko mag Amon ondiki e Kitap Weche mag Ndalo mag Ruodhi mag Juda.

²⁶ Noyike e liende mane nie puoth Uza. Josia nodoko ruoth kare.