2 Ruodhi 20 - MUMA MALER 2015

Tuo mar Hezekia

¹ E ndalogo, Hezekia ne tuo, kendo ohewore. Janabi Isaya wuod Amoz nobiro ire, mowachone niya, “Ruoth Nyasaye owachoni ni mondo ilam mwanduni ni yawuoti, nimar ibiro tho, ok nikwo.”

² Kane Hezekia owinjo kamano, nolokore mong’iyo kor ot, kokwayo Ruoth Nyasaye niya,

³ “A Ruoth Nyasaye, asayi, parie kaka asewuotho e nyimi gi adieri kod chuny mobidhore, ka atimo gik malong’oni.” Eka ne oywak malit.

⁴ To kane Isaya pok ochopo e dier laru, wach Ruoth Nyasaye nobirone niya,

⁵ “Dogi iwach ni Hezekia ma jatend joga, ni Ruoth Nyasaye ma Nyasach Daudi kwaru owacho kama: ‘Asewinjo kwayoni, kendo aseneno pi wang’i. Omiyo abiro changi, kendo bang’ ndalo adek inidhi e Od Ruoth Nyasaye.

⁶ Abiro medi ndalo moromo higni apar gabich, bende abiro resi kaachiel gi dala Jerusalem e lwet ruodh Asuria, kendo abiro rito dalani nikech nyinga, kendo nikech Daudi jatichna.’ ”

⁷ Eka Isaya nowacho ni jood Hezekia ni mondo okel ng’owo moswagi omwon e bur mane okuodo Hezekia. Ne gitimo kamano, mi Hezekia nochango.

⁸ Bang’ mano, Hezekia nopenjo Isaya niya, “Ere gima biro bedona ranyisi ni Ruoth Nyasaye biro changa, kendo ni anadhi e Hekalune bang’ ndalo adek?”

⁹ Isaya nodwoke, ka penje niya, “Diher mondo tipo mar wang’chieng’ manie raidhi odhi nyime ondamo apar, koso mondo odog chien ondamo apar? Mano e ranyisi ma Ruoth Nyasaye onyisigo ni enotim gima osewacho.”

¹⁰ To Hezekia nokone niya, “En gima yot mondo tipo odhi nyime ondamo apar. Emomiyo tipo mondo odog mana chien ondamo apar.”

¹¹ Eka Isaya janabi nokwayo Ruoth Nyasaye kamano, mi Ruoth Nyasaye nodwoko tipo chien ondamo apar e raidhi mane Ahaz oloso.

Hezekia orwako joote moa Babulon

¹² E ndalogo Merodak-baladan nooro joote ir Hezekia gi barupe kod mich, nikech nowinjo ni yande otuo.

¹³ Hezekia norwako jootego, monyisogi mwandune duto mane nie ode mar keno, kaka fedha gi dhahabu gi gik mang’ue ng’ar, gi mo ma nengone tek, kod gige mag lweny, kaachiel gi gik moko duto mane ni kuonde kenone. Onge gimoro amora e ode kata e pinye mane ok onyisogi.

¹⁴ To bang’e janabi Isaya nobiro ir Ruoth hezekia, mopenje niya, “Jogi oa kanye? To wach ang’o mokelogi?” Hezekia nodwoke ni, “Gia e piny Babulon, kuma bor.”

¹⁵ Isaya nomedo penje niya, “To ang’o ma gineno e odi?” Hezekia nodwoke ni, “Giseneno gik moko duto manie oda. Onge gimoro amora modong’ mak anyisogi e kuonde kenona.”

¹⁶ Eka Isaya nowacho ni Hezekia niya, “Winj wach Ruoth Nyasaye!

¹⁷ Ndalo biro ma gik moko duto manie odi, ma kwereni osekano nyaka chil kawuono, noter Babulon. Bende Ruoth Nyasaye omedo wacho ni onge gima nodong’ kata achiel mak oter kuno.

¹⁸ Yawuoti moko nolok wasumbni. Adier, moko kuom yawuoti hie nolok wasumbni mabuoch e od ruodh Babulon.”

¹⁹ Hezekia ne odwoke niya, “Wach Ruoth Nyasaye ma isenyisa ber.” To ne odwoke kamano, koparo ni en to kue biro siko e ndalone duto.

Tho mar Hezekia

²⁰ Weche moko mag Hezekia, gi tekone duto, kendo kaka noloso yawo gi fereji maduong’ mane kelo pi Jerusalem, ondik e Kitap Weche mag Ndalo mag Juda.

²¹ Hezekia notho, moyiki but kwerene. Manase wuode nodoko ruoth kare.