2 Ruodhi 19 - MUMA MALER 2015

Nyasaye oreso piny Juda e lwet Senakerib

¹ Kane ruoth Hezekia owinjo wechego, noyiecho lepe, mi orwako pien gugru, kendo odhi e Od Ruoth Nyasaye.

² Nooro Eliakim ma jaduong’ ode gi Shebna ma jagoro kod jodolo madongo ir janabi Isaya wuod Amoz ka jorwako piende gugru,

³ mondo odhi owachne niya, “Hezekia owacho ni kawuono en chieng’ dhier gi kum kod wichkuot. Wachalo gi dhako ma muoch kayo, to onge muya mochologo nyathi.

⁴ Nyalo bet ni Ruoth Nyasaye ma Nyasachi osewinjo weche Rabshake ma ruodh Asuria oseoro mondo oyany Nyasaye Mangima. Omiyo kamoro obiro kumo Rabshake nikech weche ma osewinjo ka Rabshake wachogo. Kuom mano, in Isaya, lem ni jowa mapod odong’.”

⁵ Kamano kane jodong ruoth Hezekia ochopo ir Isaya, nowachone wechego,

⁶ nodwokogi niya, “Dhiuru uwach ni ruodhu ni Ruoth Nyasaye owacho kama: ‘Kik iluor weche ma isewinjo ka ruodh Asuria yanyago,

⁷ nikech abiro miye chuny man gi kibaji, mi, kowinjo wach moro marach, to noring odog e pinye, kuma nami onegee.’ ”

⁸ Rabshake nodok, moyudo ni ruodh Asuria osea Lakish, odhi monjo Libna. Omiyo nodhi ire kuno.

⁹ To kane ruodh Asuria owinjo Tirhaka ruodh Ethiopia obiro monje, nochako ooro joote ir Hezekia ruodh Juda, kowacho niya,

¹⁰ “Kik iyie Nyasachi migeno kuomeno wuondi ni ruodh Asuria ok nokaw Jerusalem

¹¹ Chutho, isewinjo kaka ruodhi mag Asuria oseketho pinje mane gikedogo chuth. To koro iparo ni in ema dikwo?

¹² Kwerena nonego jo-Gozan gi jo-Haran gi jo-Rezef kod jo-Eden ma nodak Telasar. Koro dak ne nyisechegi okonyogi?

¹³ Koso ere ruodhi mag Hamath gi Arpad gi Sefarvaim gi Hena kod Iva?”

¹⁴ Hezekia nokawo barua mane joote okelone, mi osomo. Bang’e ne odhi e Hekalu, mi oyaro baruano e nyim Ruoth Nyasaye, kokwaye niya,

¹⁵ “A Ruoth Nyasaye ma Nyasach Israel, mobet ewi kerubi kaka ruoth bet e kom duong’ne, in kendi e Nyasach ogendini duto mae piny, kendo in ema nichueyo polo gi piny.

¹⁶ A Ruoth Nyasaye, chik iti mondo iwinji, kendo yaw wang’i mondo inen. Winj weche ma Senakerib yanyigo, in Nyasaye Mangima!

¹⁷ A Ruoth Nyasaye, en adier ni ruodhi mag Asuria oseketho pinje duto,

¹⁸ mi gibolo nyisechegi e mach, kendo gisekethogi chuth, nimar ne ok gin nyiseche kata matin, to mana tich dhano molos gi yath kata gi kidi.

¹⁹ To koro in Ruoth Nyasaye ma Nyasachwa, yie ireswa e lwet Senakerib, mondo ogendinii duto mae piny ong’e ni in kendi e Nyasaye.”

²⁰ Eka Isaya wuod Amoz nooro ni Hezekia wach niya, “Ruoth Nyasaye ma Nyasach Israel owacho ni osewinjo lemo mikwayego nikech wach ma Senakerib ruodh Asuria osesiemigo,

²¹ omiyo osewuoyo kuom Senakerib kama: “In Senakerib, dala Sayun ochayi kendo jari! Ee, dala Sayun twenyoni ume!

²² To koro in, en ng’ano ma isejaro kendo iyanyo? Koso en ng’a, ma isekokne, kijowo wang’i! Nyaka ing’e ni en Ng’ama Ler mar Israel!

²³ Isejaro Ruoth Nyasaye kimiyo jooteni wacho niya, ‘Aseidho gode maboyo mag Lebanon, mi achopo midimidi, ka an gi gechena mag lweny mang’eny mokadho akwana. Bende asetong’o yiend sida madongo, kod yiend saipras mabeyo man kuno. Asechopo nyaka e chuny bungu, kuma ni iye mogik, kendo ma yien odichie.

²⁴ Asekunyo sokni, mi amodho pi pinje mamoko. Bende aore mag Misri noduono, ka anyonogi gi tienda!’

²⁵ To in Senakerib, kata obedo ni iwacho kamano, donge ing’eyo ni an Ruoth Nyasaye ema nachano chon mondo gigo otimre? Adier, ne achanogi chon, to koro amiyo gitimore. An ema ne achano mondo imuk mier mochiel motegno olokre gundni.

²⁶ Ma joma odakie chalo gi lum mae pap, maonge gi teko, kata ka lum matwi e tat ot, to ner kapok odongo, nimar ne gionge gi teko, kendo ne ging’eng’ ka luoro omakogi.

²⁷ To ang’eyo timbeni duto: ang’eyo kata ka ichung’ kata ka ibet piny, kata kiwuok kata kiduogo dala.

²⁸ Asewinjo kaka iyanya malich, kendo kaka isungori, omiyo abiro keto mbedo e umi, kod rajaki e dhogi, mondo awichi idog thuru gi yo mane ibirogo.

²⁹ “To winji, in Hezekia, ranyisi ma amiyi ema: E higa mokwongoni, unucham gik matwi kendgi, kendo e higa mar ariyo unucham orowe moloth e higa mokwongono, to e higa mar adek unuket kodhi, kendo unuka cham. Bende unupidh mzabibu, kendo unucham olembgi.

³⁰ Jo-Juda modong’ nochal gi yath matero tiendene piny, kendo nyago olemo e bedene,

³¹ nimar joma nok modong’ nowuog Jerusalem. Adier, oganda mar joma otony noa e got Sayun. Ruoth Nyasaye oseketo chunye mondo otim mano.”

³² Kuom mano, Ruoth Nyasaye owuoyo kuom ruodh Asuria kama: “Ok nodonj e dala Jerusalem, kendo ok nobaye gi asere, kata monjogo koting’o kuot ok nomonje. Bende ok noging pith mondo oidhgo ohingane.

³³ Enodog gi yo ma nobirogo, to ok nodonj Jerusalem,

³⁴ nimar anaked ni dalani mondo aresi, nikech nyinga, kendo nikech Daudi jatichna.”

³⁵ Otienono, malaika mar Ruoth Nyasaye nodhi monego jo-Asuria alufu mia achiel gi piero aboro gabich (185,000) e kambigi, kendo kane ji ochiew gokinyi, to ringre joma otho ema ne ginwang’o kopie piny.

³⁶ Mano omiyo Senakerib ruodh Asuria noa kuno, mi odok Nineve odakie.

³⁷ To chieng’ moro, kane oyudo olemo e od Nisrok nyiseche, yawuote ma Adramalek gi Sharezer nobiro monege. Bang’e ne giringo, mi gidhi e piny Ararat, to Esarhadon nodoko ruoth kar Senakarib wuon mare.