2 Ruodhi 17 - MUMA MALER 2015

Okaw Samaria, mi oter jo-Israel e tuech

¹ E higa mar apar gariyo mar loch Ahaz ruodh Juda, Hoshea wuod Ela nodoko ruodh Israel, morito piny kuom higni ochiko, kodak Samaria.

² Timbene ne ok long’o e nyim Ruoth Nyasaye, to ok ne giricho kaka timbe ruodhi mag Israel mane okuongone tiyo.

³ Shalmaneser ruodh Asuria nokedo gi Hoshea, mi oloyo. Koro Hoshea nobet e bwo lochne, kendo golone osuru.

⁴ To ruodh Asuria noyudo ni Hoshea ndhoge, nikech Hoshea noseoro joote ir So ruodh Misri, bende noweyo chulo osuru kaka nosebedo kotimo higa ka higa. Kuom mano, ruodh Asuria nomake, mokete e od tuech.

⁵ Eka ruodh Asuria nomonjo pinyno duto, mochopo Samaria. Nolwore kuom higni adek,

⁶ mokawe e higa mar ochiko mar loch Hoshea. Nomako jo-Israel, motero Asuria, kendo noketo moko mondo odag Hela but aora Habor man Gazon, to moko noketo e miech jo-Media.

⁷ Mano notimore nikech timbe jo-Israel ne ok long’o e nyim Ruoth Nyasaye mane ogologi e piny Misri e bwo loch Farao.

⁸ Ne gilamo nyiseche mamoko, kendo ne giluwo timbe mane ruodhi mag Israel oketo, kod timbe ogendini mane Nyasaye oriembo e pinygi mondo owe ni jo-Israel thuolo.

⁹ Jo-Israel noyanyo Ruoth Nyasaye ma Nyasachgi, kendo ne gigero ut lemo e hembko mane nie miechgi matindo gi madongo duto.

¹⁰ Ne gichungo sirni milamo mag kite gi mag yien ewi gode maboyo duto, kendo yiend yath moro amora motimo otiep.

¹¹ Ne giwang’o ubani kuondego duto, kaka ogendini mane Ruoth Nyasaye oriembo e pinyno ne timo, kendo ne gitimo timbe mamono, mane omiyo Ruoth Nyasaye mirima.

¹² Ne gilamo nyiseche manono mane Ruoth Nyasaye okwerogi ni kik gilam.

¹³ Ruoth Nyasaye ne siemo jo-Israel kod jo-Juda, kooronigi jonabi gi jokor wach duto, kowachonigi niya, “Weuru yoreu maricho, mondo umak chikena gi buchena ma jonabina mane aoro onyiso kwereu.”

¹⁴ To kata kamano, ne gidagi weyo yorego, nikech ne wigi tek ka wi kweregi mane ok oyie kuom Ruoth Nyasaye ma Nyasachgi.

¹⁵ Ne gichayo chikene gi singruokne mane otimo kod kweregi, kendo ne ok gidewo weche mane osiemogigo. Ne gilamo nyiseche manono, nyaka gin giwegi gidoko joma nono, nikech ne giluwo timbe mag ogendini mokiewo kodgi, mane Ruoth Nyasaye osekwerogi ni kik giluw.

¹⁶ Ne giweyo chike duto mag Ruoth Nyasaye ma Nyasachgi, ka gilenyo mula mi gilosgo nyiroye ariyo mondo gilam, kendo ka gichungo siro milamo. Bende ne gilamo sulue duto, kendo ne gitiyo ni Baal.

¹⁷ Ne giwang’o yawuotgi gi nyigi ka misango, kendo ne giwuoyo gi nyakalondo. Kamano ne gichiwore ni timbe maricho e nyim Ruoth Nyasaye, ka gimiyego mirima.

¹⁸ Kuom mano, Ruoth Nyasaye nokecho ahinya gi jo-Israel, mi noriembogi e nyime, ma onge modong’ mak mana jo-Juda kende.

¹⁹ Jo-Juda bende ne ok orito chik Ruoth Nyasaye ma Nyasachgi, to ne giluwo mana timbe mane jo-Israel ochako timo.

²⁰ Omiyo Ruoth Nyasaye nodagi nyikwa Israel duto. Nothagogi moketogi e lwet wasigu mane peyogi to achien nogologi e pinygi.

²¹ Kane Ruoth Nyasaye opogo jo-Israel kuom dhood Daudi, jo-Israel noketo Jeroboam wuod Nebat ruoth. Mi Jeroboam nohoyo jo-Israel mondo owe luwo Ruoth Nyasaye, kendo nomiyo gidonjo e richo maduong’.

²² Jo-Israel noluwo timbe maricho duto mane Jeroboam otimo. Ne ok giweyo richogo kata matin,

²³ nyaka Ruoth Nyasaye nogologi e nyime, kaka nosemiyo jonabine duto owacho. Nodarogi moterogi Asuria, kuma gintie nyaka chil kawuono.

Ruodh Asuria okelo ogendini moko mondo odag Samaria

²⁴ Ruodh Asuria nogolo ji Babulon gi Kutha gi Ava gi Hamath kod Sefarvaim, moketogi e miech Samaria kar jo-Israel, mi ne gidoko weg pinyno.

²⁵ To kane gichako dak kanyo, ne ok gilam Ruoth Nyasaye, omiyo Ruoth Nyasaye nooro sibuoche, monego jomoko kuomgi.

²⁶ Ne onyis ruodh Asuria niya, “Ogendini mane idaro, miketo e miech Samaria, ok ong’eyo yo ma onego olamgo nyasach pinyno. Kuom mano, nyasayeno oseoro sibuoche ma koro negogi.”

²⁷ Eka ruodh Asuria nowacho niya, “Dwokuru achiel kuom jodolo mane agolo Samaria, odhi odag kuro, kapuonjogi kaka onego lam nyasach pinyno.”

²⁸ Kamano jadolo achiel mane osegol Samaria nodok kuro, modak Bethel kapuonjo ji kaka onego lam Ruoth Nyasaye.

²⁹ To kata kamano, oganda ka oganda ne pod loso nyisechegi giwegi, kendo ketogi ei ut lemo mane jo-Samaria oloso e hembko mane ni kuonde moting’ore. Nyiseche mane oganda ka oganda oloso e miechgi e magi:

³⁰ Jo-Babulon noloso Sukoth-benoth nyasachgi, kendo jo-Kuth noloso Nergal. Jo-Hamath to noloso Ashima,

³¹ kendo jo-Arvi noloso Nibhaz kod Tartak, to jo-Sefarvaim ne wang’o nyithindgi ka misango ni Adramelek gi Anamelek mane nyisechegi.

³² To kaachiel gi nyisechego ne gilamo Ruoth Nyasaye bende, kendo ne giyiero ji ariyo mondo obed jodolo mag hembko mane ni kuonde moting’ore, mondo otimnigi misengni kuondego.

³³ Kamano ne gilamo Ruoth Nyasaye, to bende ne gitiyo ni nyisechegi giwegi, ka giluwo timbe pinje mane ogolgie.

³⁴ Pod giluwo timbe machon-go nyaka chil kawuono. Ok giluoro Ruoth Nyasaye, bende ok giluw buchene gi yorene, kata mako puonjne, kata rito chik mane oketo ni nyikwa Jakobo, jal mane Ruoth Nyasaye oloko nyinge ni Israel.

³⁵ Ruoth Nyasaye nosetimo kodgi singruok, kawachonigi niya, “Kik ulam nyiseche mamoko, kata kik ukulrunigi. Kim utinigi, kata kik utimnigi misango.

³⁶ To an ema mondo ukulruna kendo utimna misango, nikech an ema nagolou e piny Misri gi teko maduong’, karieyo bada ni lweny.

³⁷ Kik ulam nyiseche mamoko, to rituru buchena gi chikena mane aketonu e ndiko.

³⁸ Wiu kik wil gi singruok mane atimo kodu. Kik ulam nyiseche mamoko,

³⁹ to lamuru mana an Ruoth Nyasaye, mi anaresu e lwet wasiku duto.”

⁴⁰ Kata kamano ne ok gidewo, to ne gisiko gi timbegi machon.

⁴¹ Kamano ogendinigo ne lamo Ruoth Nyasaye, to gi nyiseche manono bende. Nyithindgi gi nyikwagi ne timo kaka kweregi ne timo, kendo pod gitimo kamano nyaka chil kawuono.