2 Ruodhi 16 - MUMA MALER 2015

Loch Ahaz, ruodh Juda

¹ E higa mar apar gabiriyo mar loch Peka wuod Remalia ema Ahaz wuod Jotham nodokoe ruodh Juda.

² Ne en jahigni piero ariyo kane ochako tich, morito piny kuom higni apar gauchiel, kodak Jerusalem. To timbene ne ok long’o e nyim Ruoth Nyasaye kaka timbe Daudi wuon mare ne long’o.

³ Noluwo timbe ruodhi mag Israel, to gima rach moloyo, en ni nowang’o wuode ka gir misango, koluwo timbe makuero mag ogendini mane Ruoth Nyasaye oriembo mondo owe thuolo ni jo-Israel.

⁴ Bende notimo misengni, kendo nowang’o ubani, e hembko ewi gode, kendo e tiend yath moro amora motimo otiep.

⁵ E ndalogo, Rezin, ruodh Aram, gi Peka wuod Remalia ruodh Israel nodhi monjo Jerusalem. Ne gilworo Ahaz gi joge, to ne ok ginyal loye.

⁶ (Kindego bende ema ruodh Edom noriemboe jo-Juda Elath, modwoko ni jo-Edom, mi jo-Edom nodhi Elath, kuma gidakie nyaka chil kawuono.)

⁷ To kane Ahaz oyudo ni ruodhigo olwore kamano, nooro joote ir Tiglath-pileser ruodh Asuria, kowachone niya, “An nyathini kendo jatichni, yie ibi iresa e lwet ruodh Aram gi ruodh Israel ma kedo koda.”

⁸ Bende Ahaz nokawo fedha gi dhahabu mane nie Od Ruoth Nyasaye kod kar keno mar od ruoth, mooro ni ruodh Asuria kaka chiwo.

⁹ Ruodh Asuria noyie gi wechene, modhi omonjo Damaski, mokawo. Nodaro joma odakie, motero e tuech Kir. Rezin bende nonego.

¹⁰ Kane ruoth Ahaz odhi Damaski romo gi Tiglath-pileser ruodh Asuria, noneno kendo-mar-misango mane ni kuno, mi nooro ni Uria jadolo kido mar kendono gi romne duto, manyise kaka ochalo.

¹¹ Uria jadolo noloso kendo-mar-misango machielo machal gi mano chuth, kendo notieke kapok ruoth Ahaz oduogo koa Damaski.

¹² Kane ruoth oduogo, norango kendono. Eka noidho raidhi, kosudo machiegni kode.

¹³ Nowang’oe misango miwang’o pep, kod misango mar mogo. Bende notimoe misango miolo piny, kendo nokiroe remb misengni mag sawo.

¹⁴ To kendo-mar-misango mar mula mane nie nyim Ruoth Nyasaye nogolo e kind kendone manyien gi Od Ruoth Nyasaye, moketo yo nyandwat mar kendo manyienno.

¹⁵ Ruoth Ahaz nowacho ni Uria jadolo niya, “E kendo maduong’ni ema nitimie misango mar okinyi, kod mar mogo mitimo godhiambo, gi mar ruoth kod misangone mar mogo kod misengni miolo piny. Inikir kuome remo duto mag misengni mamoko. To kendo-mar-mula ema anapenjie Ruoth Nyasaye wach.”

¹⁶ Uria jadolo notimo gik mojo duto kaka ruoth Ahaz nochike.

¹⁷ Ruoth Ahaz nong’ado frembe mag rachungi mane nie Hekalu, kendo nogolo nyilerni mane nie wigi. Gima ne iluongo ni nam bende nogolo kuom ruedhi mag mula mane nie bwoye, mi orenjo e rachungi mar kite.

¹⁸ Bende nomuko agola mane okonyorego chieng’ Sabato, gi dhorangach ma oko mane odonjogo e Od Ruoth Nyasaye, nikech noluoro ruodh Asuria.

¹⁹ Timbe moko mag Ahaz ondiki e Kitap Weche mag Ndalo mag Ruodhi mag Juda.

²⁰ Ahaz notho, moyike but kwerene e dala Daudi. Hezekia wuode nodoko ruoth kare.