2 Ruodhi 12 - MUMA MALER 2015

¹ E higa mar abiriyo mar loch Jehu, Joash nodoko ruoth, morito piny kuom higni piero ang’wen kodak Jerusalem. Min mare ne nyinge Zibia nyar Beer-sheba.

² Timbe Joash ne long’o e nyim Ruoth Nyasaye ndalone duto, nikech Jehoyada jadolo ne ng’adone rieko.

³ To kata kamano ne ok oketho hembko mane ni kuonde moting’ore, kendo ji ne pod timo misengni, kendo wang’o ubani kuondego.

⁴ Joash nowachone jadolo niya, “Kawuru pesa duto michiwo ni Ruoth Nyasaye ma ji kelo e Hekalu, bed ni en solro momi ng’ato ka ng’ato mondo ogol, kata en pesa ma ng’ato chiwo kuom herone.

⁵ Tiuru gi pesago kuom kuonde mokethore e Hekalu.”

⁶ To kane Joash osebedo ruoth kuom higni piero ariyo gadek jodolo ne pok oloso kuonde ma nokethore e Hekalugo.

⁷ Omiyo ruoth Joash noluongo Jehoyada jadolo, kod jodolo wetene, mowachonigi niya, “Ang’o momiyo ok ulos kuonde mokethore e Hekalu? Koro weuru tiyo gi pesa ma joweteu golo, to chiwgiuru mondo ulosgo Hekalu.”

⁸ Jodolo ne oyie ni ok giniti gi pesa ma ji ogolo, to bende ni ok ginilos Hekalu.

⁹ Jehoyada jadolo nokawo sanduk moro, motucho raumne, eka noketo sandugno e bath dhoot korachwich, kidonjo e Od Ruoth Nyasaye. Pesa duto mane ji kelo e Od Ruoth Nyasaye, jodolo ma jorit dhoot ne keto e sandugno.

¹⁰ To kane gineno ni pesa ng’eny e sanduk, to jagoro mar ruoth gi jadolo maduong’ ne jodhi e Od Ruoth Nyasaye kwano pesa, kendo tueyogi e kirope.

¹¹ Eka ne gimiyogi nyipeche mane rito tich loso Hekalu, nikech nyipechego ema ne chulo jopecho gi jogedo

¹² kod jopa kite, kendo gin ema ne ging’iewo yien, gi kite mopa, kod gimoro amora mane idwaro mondo olosgo kuonde mokethore e Od Ruoth Nyasaye.

¹³ To nyilerni mag fedha, gi rangis teyni, kod tewni gi tunge, kod gik moko mag fedha kata mag dhahabu ne ok olos gi pesa mane okel e Od Ruoth Nyasaye,

¹⁴ nikech pesago duto ne gimiyo jotich kuom loso Od Ruoth Nyasaye.

¹⁵ To bende ne ok penj kaka pesa tiyo, nikech joma nomi pesa mondo ochul jotich ne gin joma ogen.

¹⁶ To chiwo mipwodhogo ketho mar gowi, kod mag golo richo ne ok kel e Od Ruoth Nyasaye, nimar ne gin mag jodolo.

¹⁷ E ndalogo, Hazael ruodh Aram nodhi kedo gi jo-Gath, mi nokawo dalagi. Bang’ mano, noikore mondo odhi omonj Jerusalem.

¹⁸ To Joash ruodh Juda nokawo gik moko duto mane Jehoshafat gi Jehoram kod Ahazia osechiwo ni Ruoth Nyasaye. (Kwerene adekgo duto nosebet ruodhi mag Juda.) Gigo duto Joash nooro ni Hazael ruodh Aram, kaachiel gi gik moko mane en owuon osechiwo ni Ruoth Nyasaye, kaachiel gi dhahabu duto mane nie kar keno mar Od Ruoth Nyasaye, kod kar keno mar od ruoth. Mi Hazael ne ok omonjo Jerusalem.

¹⁹ Weche moko mag Joash, gi timbene duto, ondiki e Kitap Weche mag Ndalo mag Ruodhi mag Juda.

²⁰ Jodonge nojame monege e od Milo man yo madhi Sila.

²¹ Jozakar wuod Shimeath, kod Jehozabad wuod Shomer e jodonge mane onege. Noyike but kwerene e dala Daudi, mi Amazia wuode nodoko ruoth kare.