2 Ruodhi 11 - MUMA MALER 2015

Athalia okawo loch gi thwon

¹ Kane Athalia min Ahazia oneno ni wuode osetho, nonego joka ruoth duto.

² To Jehosheba nyar ruoth Jehoram, ma nyamin Ahazia, nogolo Joash ling’ling’ kuom yawuot ruoth ma nidwaro nego, mi nopande e od nindo kod japite. Kamano Athalia ne ok onege.

³ Joash nodak kod Jehosheba e Od Ruoth Nyasaye kuom higni auchiel e kinde mar loch Athalia.

⁴ To e higa mar abiriyo, Jehoyada jadolo nooro wach, moluongo jotend jo-Kari kod jotend askeche ma jorit, mondo obi ire e Od Ruoth Nyasaye. Notimo kodgi winjruok, kendo nomiyo gikuong’ore, eka nonyisogii wuod ruoth.

⁵ Nochikogi kama:

⁶ “Migap askeche ma tiyo chieng’ Sabato nyaka rit od ruoth,

⁷ to migepe ariyo modong’ mondo orit Od Ruoth Nyasaye,

⁸ kendo oluor ruoth ka girite, ka ng’ato ka ng’ato omako gilweny e lwete. Ka ng’at moro amora dwaro mwomou, to negeuru. Bende kamoro amora ma ruoth dhiye, to koweuru kurite.”

⁹ Jotend askeche notimo duto mane Jehoyada jadolo ochikogi. Ng’ato ka ng’ato kuomgi nokelo askeche duto mane onego oa e tich chieng’ Sabato, kaachiel gi mago mane onego ochak tich chieng’no.

¹⁰ Jadolono nopogo ni jotend askechego tonge gi kuodi mane mag ruoth Daudi, mane okan e Od Ruoth Nyasaye.

¹¹ Askeche mag jorit noriedo, ka ng’ato ka ng’ato omako gilweny e lwete, chakre yo milambo nyaka yo nyandwat mar Hekalu, ka gilworo kendo-mar-misango kaachiel gi Hekalu.

¹² Eka Jehoyada nogolo wuod ruoth oko. Nosidhone osimb duong’, momiye kitap chik, kendo nowire gi mo mondo obed ruoth. Ji duto nopamo lwetgi, ka kok niya, “Ruoth mondo odag aming’a!”

¹³ Kane Athalia owinjo mahu mar ji, nodhi e Od Ruoth Nyasaye kama ne gintie.

¹⁴ Noneno ruoth kochung’ e bath siro, kaka kit jo-Israel nobet, ka tung’ ywak, kendo ji wer. Ji duto ne mor, kendo goyo tung’. Mi Athalia noyiecho lepe, ka kok niya, “Ujemo! Ujemo!”

¹⁵ Jehoyada jadolo nowacho ni jotend askeche niya, “Goleuru oko! Kik unege e Od Ruoth Nyasaye, kendo ka ng’at moro oluwe, to neguru ng’atno.”

¹⁶ Omiyo ne gimake, kendo ne gigole ka giluwo dhorangach mane farese donjogo e dala ruoth, mi ne ginege kanyo.

¹⁷ Eka Jehoyada nomiyo ruoth kod jo-Israel osingore ni Ruoth Nyasaye, ni ginibed jo-Ruoth Nyasaye. Nomiyo ruoth gi ji bende otimo winjruok e kindgi giwegi.

¹⁸ Mi ji duto nodhi momuko od Baal, kendo ne ginego Matan jadolo mar Baal e nyim kende mag liswago. Jehoyada noketo jorit e Od Ruoth Nyasaye.

¹⁹ Eka nodhi gi jotend askeche, gi jo-Kari, kod ji duto, mi ne giwuok gi ruoth e Od Ruoth Nyasaye. Ne gikowe nyaka e od ruoth, ka giluwo dhoranga jorit. Eka Joash nobet e kom duong’.

²⁰ Kane oseneg Athalia e od ruoth, ji duto nobedo mamor, kendo Jerusalem nokue.

Loch Joash, ruodh Juda

²¹ Joash ne jahigni abiriyo kane odoko ruoth.