1 Samuel 8 - MUMA MALER 2015

Jo-Israel okwayo mondo omigi ruoth

¹ Kane Samuel oseti, noketo yawuote mondo obed jong’ad bura e Israel.

² Nying wuode makayo ne Joel, to jalupne ne Abija. Ne gin jong’ad bura Beer-sheba.

³ Yawuotego ne ok oluwo timbene, to ne giketho bura, ka gibaro kuom dwaro mwandu malang’, kendo kuom chamo asoya.

⁴ Kuom mano, jodong Israel duto nochokore kanyakla, modhi Rama ir Samuel.

⁵ Ne giwachone niya, “Iseti, to yawuoti ok luw timbeni. Koro ketnwa ruoth mondo oritwa, mana machalre gi ogendini duto.”

⁶ To kane gikwayo Samuel mondo omigi ruoth kamano, wachno ne rachne, mi nolamo Ruoth Nyasaye,

⁷ to Ruoth Nyasaye nowachone niya, “Winj gima ji wachoni. Ok in ema gidagi, to an ema gisedaga, ni kik abed ruodhgi.

⁸ Gima koro gitimoni, en gima gisebedo ka gitimona, chakre ndalo mane agologie Misri nyaka chil kawuono, ka giweya, kendo gitiyo ni nyiseche mamoko.

⁹ Emomiyo koro, winj gima giwachoni. To kata kamano, siemgi matek, kendo nyisgi kaka ruoth biro ritogi.”

¹⁰ Samuel nonyiso joma ne kwaye ruoth weche duto mane Ruoth Nyasaye osewachone.

¹¹ Nowachonigi niya, “Timbe ruoth ma biro ritou nochal kama: Enokaw yawuotu, mi noketgi e tich gechene. Ginibed joidh faresene, kendo giniring e nyim gechene.

¹² Enoketgi jodong lweny madongo gi matindo, kendo noket jomoko mondo opur puothene, mi gika chambe, kendo moko nolos gige mag lweny gi gik moko mag gechene.

¹³ Enokaw nyiu mondo olos gik mang’ue ng’ar, gi joted chiemo kod makati.

¹⁴ Enokaw puotheu mabeyo moloyo mag cham, gi mag mzabibu, kod mag zeituni, mi enomi jotichne.

¹⁵ Nokaw achiel kuom apar mar chambu gi mar mzabibu mau, mi enomi jodonge kod jotichne.

¹⁶ Nokaw jotichu machwo gi jotichu manyiri, gi dhou kod kenjeu mabeyo, mi noketgi e tichne.

¹⁷ Nokaw achiel kuom apar mag jambu, kendo un bende unubed wasumbni mage.

¹⁸ Mi unuywag e ndalono nikech timbe ruodhu mane uyiero, to Ruoth Nyasaye ok nowinju e ndalono.”

¹⁹ Kata kamano, ji nodagi winjo dwond Samuel, mi ne giwachone niya, “Ooyo, nyaka wabed gi ruoth ma ritowa,

²⁰ mondo wan bende wachalre gi ogendini duto, ka ruodhwa ritowa, kendo telonwa ka wakedo.”

²¹ Kane Samuel osewinjo weche duto mag jo-Israel, nonyiso Ruoth Nyasaye,

²² mi Ruoth Nyasaye nodwoke niya, “Winj gima giwachoni, mondo iketnigi ruoth.” Eka Samuel nowacho ni jo-Israel ni mondo ng’ato ka ng’ato odog dalane.