1 Samuel 5 - MUMA MALER 2015

Gik mane otimore kane Sanduk nie piny Filistia

¹ Kane jo-Filistia okawo Sanduk mar Nyasaye, ne gigole Ebenezer, mi gikele Ashdod.

² Eka ne gitere e od nyasachgi ma Dagon, mi gikete but nyasachgino.

³ Kinyne gokinyi, kane jo-Ashdod obiro, ne giyudo ni Dagon osepodho piny auma e nyim Sanduk mar Ruoth Nyasaye. Omiyo ne gichunge, mi gidwoke kare.

⁴ Kinyne gokinyi mar ariyo, kane gibiro, ne ginwang’o ni Dagon ochako opodho piny auma e nyim Sanduk mar Ruoth Nyasaye, mi wiye gi luetene ochot, molwar e paw dhoot. Kor Dagon kende ema nodong’.

⁵ Mano emomiyo jodolo mag Dagon, kata ng’ato ang’ata ma donjo e od Dagon, ok nyon paw dhood Dagon e Ashdod, nyaka chil kawuono.

⁶ Ruoth Nyasaye nosando jo-Ashdod malich, mi luoro omakogi. Nogoyogi gi tuo mar buche, kendo oyieyo bende nopong’o pinygi.

⁷ Kane jo-Ashdod oneno gima timore, ne giwacho niya, “Sanduk mar Nyasach jo-Israel kik bed e dierwa, nimar osandowa malit, kendo osando Dagon nyasachwa bende.”

⁸ Omiyo ne giluongo ruodhi duto mag jo-Filistia mondo gine ane gima ginyalo timo gi Sanduk mar Nyasach Israel. Jogo nodwokogi niya, “Goluru Sanduk mar Nyasach Israel, uter Gath.” Kuom mano, ne gigolo Sanduk mar Nyasach Israel, gitero kuno.

⁹ Kane gisetere, eka Nyasaye nochako sando jo-Gath ahinya. Nogoyo jodalano, matindo gi madongo gi tuo mar buche mokwodogi.

¹⁰ Omiyo ne gikowo sanduk mar Nyasaye Ekron. Kane ochopo Ekron, jo-Ekron noywak, kawacho niya, “Gisekelo Sanduk mar Nyasach Israel kuomwa mondo onegwa waduto.”

¹¹ Emomiyo ne giluongo ruodhi duto mag jo-Filistia, mi giwachonigi niya, “Dwokuru Sanduk mar Nyasach Israel kare, mondo kik onegwa waduto.” Ji mang’eny notho e dalano, nikech Nyasaye nosandogi malit.

¹² Jogo mane ok otho, to buche nokwodo, kendo ywak mar dalano nochopo nyaka e polo.