1 Samuel 30 - MUMA MALER 2015

Daudi oloyo jo-Amalek e lweny

¹ Chieng’ mar adek, Daudi gi joge nochopo Ziklag. To jo-Amalek noyudo ka osemonjo yo milambo mar Juda, kendo gisewang’o Ziklag mi giketho.

² To mond dalano kod ji duto matindo gi madongo, ne gimako gidhigo, ma ok ginego kata achiel

³ Omiyo kane Daudi gi joge jochopo e dala, ne giyudo kosewang’e, to mondgi gi yawuotgi kod nyigi oseter e tuech.

⁴ Daudi gi joge noywak matek, nyaka teko ma di gimed ywakgo orumo.

⁵ Ahinoam nyar Jezreel, gi Abigail chi Nabal ja-Karmel, ma mond Daudi bende noseter e tuech.

⁶ Daudi nodhier nono, nikech joge ne wacho ni mondo ogoye gi kite, nimar chunygi ne lit ahinya, ka ng’ato ka ng’ato paro yawuote gi nyige. To kata kamano Daudi noyudo teko kuom Ruoth Nyasaye.

⁷ Daudi nowacho ni Abiathar jadolo ma wuod Ahimelek niya, “Kelna efod.” Mi Abiathar nokelone law dolo miluongo ni efodno.

⁸ Daudi nopenjo Ruoth Nyasaye wach niya, “Anyalo lawo joma nomonjowago, koso? Bende dajukgi?” Mi nodwoke ni, “Lawgi, nikech adier ibiro jukogi, kendo ibiro reso jogi duto.”

⁹ Omiyo Daudi nodhi gi joge duto mia auchiel. To kane gichopo e aora Besor,

¹⁰ ji mia ariyo nool ahinya, ma ok nyal ng’ado aora, omiyo ne gidong’ kanyo, to Daudi gi ji mia ang’wen nodhi nyime gi lepo.

¹¹ Eka ne giyudo ja-Misri moro e pap, mi gikelo ir Daudi. Ne gimiye chiemo, mochamo, kod pi, momodho,

¹² bende ne gimiye ng’owo mong’in, kod saga ariyo mag mzabibu motwo. Kosechiemo, chunye noduogo, nikech nosebedo ka ok oyud chiemo, kata pi modho kuom odiechienge adek gotieno adek.

¹³ Daudi nopenje ni, “In ng’at ng’a? In jakanye?” Nodwoke ni, “An ja-Misri ma misumba ja-Amalek. To ruodha noweya, nikech nyocha ayudo tuo, ndalo adek mokadho.

¹⁴ Ne wamonjo yo milambo mar piny jo-Kereth, gi mar jo-Juda, kod mar jo-Kaleb, kendo ne wawang’o Ziklag gi mach.”

¹⁵ Daudi nokone ni, “Diyie itera ir jogo?” Nodwoke niya, “Kuong’rina e nying Nyasaye ni ok ninega, kendo ok nichiwa e lwet ruoth ma natiyone, eka dateri ir jogo.”

¹⁶ Kamano notelo ni Daudi gi joge, mi ne giyudo jo-Amalek koke e pap. Jo-Amalekgo ne chiemo kendo metho, ka gimor nikech mwandu mang’eny mane gipeyo e piny jo-Filistia, kendo e piny Juda.

¹⁷ Daudi nonegogi chakre rum piny nyaka yuso piny. Onge ng’ato kata achiel kuomgi ma notony mak mana yawuowi mia ang’wen ma noidho ngamia moringo.

¹⁸ Daudi noreso ji duto mane jo-Amalek omako kaachiel gi monde ariyo.

¹⁹ Onge jamoko kata jachan, wuowi kata nyako, mane ok oreso. Nodwoko bende gik moko duto te mane jogo opeyo.

²⁰ To bende nopeyo jambgi duto, mi jogo nosembogi e nyime, ka giwacho niya, “Magi gik ma Daudi opeyo.”

²¹ Daudi noduogo ir ji mia ariyo mane oweyo aora Besor, ka tekogi orumo, kendo ok nyal luwo bang’e, mi jogo nowuok mondo oromne kaachiel gi joma ne ni kode. Kane gichopo machiegni, ne gimosogi, kendo gipenjogi kaka wach obet.

²² To jomoko maricho, kod joma acheje mane ni kuom joma nodhi gi Daudi, nowacho niya, “Jogi ne ok odhi kodwa, omiyo kik wapognigi gimoro kuom gik mane ope ma wasereso, mak mana ni ng’ato ka ng’ato mondo oyud chiege gi nyithinde, odhigo.”

²³ To Daudi nowacho niya, “Owetena, kik utim kamano kuom gik ma Ruoth Nyasaye osemiyowa, nikech en ema oseresowa, kendo ochiwo oganda ma nomonjowano e lwetwa.

²⁴ Ere ng’ama diyie kodu e wachni? Ooyo, nyaka pog ni joma nodong’, ka rito misike, mana maromre gi joma nodhi e lweny. Nyaka pognigi maromre.”

²⁵ Chakre chieng’no nolokore tim jo-Israel nyaka chil kawuono.

²⁶ Kane Daudi odok Ziklag, nooro gik mope moko ni jodong Juda ma osiepene, kowachonigi niya, “Aoronu mich moa kuom gik mwapeyo kuom wasik Ruoth Nyasaye.”

²⁷ Jogo nodak Datir,

²⁸ gi Aroer, gi Sifmoth, gi Eshtemoa,

²⁹ gi miech jo-Jerameel, gi miech jo-Keni,

³⁰ gi Horma, gi Bora-shan, gi Athak,

³¹ gi Hebron, kod kuonde duto mane Daudi jorawoe gi joge.