1 Samuel 3 - MUMA MALER 2015

Ruoth Nasaye oluongo Samuel

¹ Nyathi ma Samuel ne tiyo ni Ruoth Nyasaye e nyim Eli. To weche mane wuok kuom Ruoth Nyasaye ne nok ndalogo, kendo ne ok fwenyre pile.

² Ndalogo wang’ Eli nosechako imore, ma ok onyal neno maber. Chieng’ moro Eli ne nindo kare mar nindo.

³ Samuel bende nosenindo e Hekalu mar Ruoth Nyasaye, kama Sanduk mar Nyasaye ne nitie. To kane taya mar Nyasaye pok otho,

⁴ Ruoth Nyasaye noluongo Samuel, mi Samuel nodwoko ni, “Antie.”

⁵ Eka noringo odhi ir Eli, mowachone niya, “Iluonga; era e.” To Eli nowachone niya, “Ok aluongi. Dog inindi.” Mi nodok monindo.

⁶ Ruoth Nyasaye noluonge kendo niya, “Samuel.” Mi Samuel nochung’, kendo odhi ir Eli, mowachone ni, “Era e, nikech iluonga.” To nodwoke ni, “Ooyo wuoda, ok aluongi. Dog inindi.”

⁷ Noyudo ka Samuel pok ong’eyo Ruoth Nyasaye, kendo wach Ruoth Nyasaye ne pok ofwenyorene,

⁸ omiyo, kane Ruoth Nyasaye oluongo Samuel kendo luong mar adek, nochung’ kendo odhi ir Eli, mowachone niya, “Era e, nikech Iluonga.” Eli nofwenyo ni kara Ruoth Nyasaye ema luongo nyathino.

⁹ Omiyo nowacho ni Samuel niya, “Dhiyo inindi, to koluongi kendo, to iwach niya, ‘Wachi, Ruoth Nyasaye, jatichni winjo.’ ” Samuel nodok, monindo.

¹⁰ Eka Ruoth Nyasaye nobiro mochung’ kanyo, kendo oluongo Samuel kaka noseluonge mokwongo niya, “Samuel, Samuel.” Eka Samuel nodwoko ni, “Wachi, jatichni winjo.”

¹¹ Mi Ruoth Nyasaye nowacho ni Samuel niya, “Abiro timo gimoro e Israel ma ng’ato ang’ata mowinjo to ite nopopni.

¹² E ndalono anachop weche duto te mane awacho kuom Eli gi dhoode.

¹³ Nyaka iwachne ni abiro ng’ado ni dhoode bura mosiko, nikech nong’eyo ni yawuote yanyo Nyasaye, to ne ok okwerogi.

¹⁴ Emomiyo akuong’ora ni dhood Eli ni, misango kata chiwo ok nopwodh richogi.”

¹⁵ Samuel nonindo nyaka okinyi, eka nochiew, moyawo dhood Hekalu mar Ruoth Nyasaye, to noluoro nyiso Eli fwenyruokno.

¹⁶ Eli noluonge, mowachone niya, “Samuel wuoda.” Nodwoke ni, “Era e,.”

¹⁷ Eli nopenje niya, “Wach ang’o ma Ruoth Nyasaye onyisi? Asayi, kik ipandago. Nyasaye mondo okwedi kipanda wach moro kuom weche duto ma nowachoni.”

¹⁸ Mi Samuel nonyise duto te, ma ok opande kata wach achiel. Eli nowacho niya, “Ruoth Nyasaye mondo otim gima oneno ni ber.”

¹⁹ Kane Samuel dongo, Ruoth Nyasaye ne ni kode, kendo weche duto mane okoro, Ruoth Nyasaye ne ochopo kare.

²⁰ Kamano jo-Israel duto, chakre Dan nyaka Beer-sheba, nong’eyo koseket Samuel mondo obed janabi mar Ruoth Nyasaye.

²¹ Ruoth Nyasaye nomedo fwenyore Shilo, nikech kanyo ema nosefwenyoree ni Samuel. Kamano wach Samuel nobedo gi teko e piny Israel duto.